హైదరాబాద్ తో మినహా మిగిలిన తెలంగాణాతో మనకి భౌతిక బాంధవ్యాలు, మానసిక అనుబంధాలు లేవు.
30 లక్షల మంది మనవాళ్ళున్న హైదరాబాద్ మనది కదనుకుంటే బాధ… అక్కడున్న మన వాళ్ళకి రక్షణ వుండదని భయం…హైదరాబాద్ ను దేశానికి రెండో రాజధాని గా చేయాలన్న డిమాండుతో రాజమండ్రి అర్బన్ దళిత ఐక్యవేదిక ఉద్యమిస్తోంది. మన భయాలకు ఇదో పరిష్కారమే!
మన పన్నుసొమ్మును మన ప్రాంతాల అభివృద్ధికే వినియోగించుకోకుండా ఇంకెంతకాలం హైదరాబాద్ ను(తెలంగాణా) పోషించాలని తాడేపల్లిగూడెంలో సాఫ్ట్ వేర్ నిపుణుడు వెంకట్ మైలవరపు ప్రశ్నిస్తున్నారు. కాలంతీరిన సమైక్యాంధ్ర పై  “రాయలాంధ్రుల” చేస్తున్నఉద్యమ డిమాండ్లు మారుతాయని సామాజిక అర్ధిక రాజకీయాల విశ్లేషకుడు, చదువుకున్న జర్నలిస్టు డానీ అంచనావేశారు.
తెలంగాణా ఉద్యమం న్యాయబద్ధమైనదనీ రాయలసీమ, ఆంధ్రా ప్రాంతాలు విడివిడిగా సొంతంగా రాషా్ట్రలు నిర్మించుకోవడం అవసరమనీ నేను గట్టిగా నమ్ముతున్నాను.
సీమాంధ్ర ప్రాంతంలో జరుగుతున్న ఉద్యమానికి కొత్త ఎజెండాను ప్రతిపాదించిన రాజమండ్రి దళిత ఐక్యవేదికకు, కళ్ళుతెరవండని వెటకారంగా హెచ్చరించిన వెంకట్ మైలవరపు గారికీ కృతజ్ఞతలు అభినందనలు!
సమైక్య వాదానికి కాలం తీరిందనడానికి గుర్తుగా ముందుగా రాలిన ఈ రెండు చినుకులూ కుంభవృష్టి కావాలనే కోరుకుంటున్నాను