❤️ గాలి లేదనుకున్న చోట పెద్ద మొక్కలున్నా, చిన్నచెట్లున్నా చాలు చల్లగా వుంటుంది. వాటి ఆకులు విసిరే గాలికి మనం పెట్టుకునే పేరు”గాలో్లతేలినట్టుంది” . అలాంటి చోట అరగంటుంటే చాలు. ఆ హాయి గొప్ప ఉత్సాహాన్ని ఇస్తుంది. 
❤️ రాజమండ్రి ప్రకాశం నగర్ రౌండ్ పార్కులో ఒకే ఒక్క రావిచెట్టు తప్ప మిగిలినవన్నీ ఆరేడు అడుగుల పెద్దమొక్కలే, అంతే ఎత్తున్న చిన్న చిన్న చెట్లే. వసంతంలో చిగురించిన ఆకులు గట్టిగా గాలొస్తే చిరిగిపోతాయన్నంత పల్చగావున్నాయి. లేత ఆకుపచ్చ రంగునుంచి ముదురు ఆకుపచ్చ రంగులోకి మారుతున్న ఒక లాంటి రంగు కరెంటు లైట్ల వెలుగులో ఆకులు కదలినపుడల్లా మెరుస్తూ డ్యాన్స్ చేస్తున్నట్టున్నాయి.
❤️ చెమటలు కక్కుతూ పార్క్ లోకి చేరాక ఇదంతా చూసి వాకింగ్ పాత్ మీద నడచి మళ్ళీ చెమటలు పట్టించుకోవాలనిపించలేదు. ఇంట్లో టె్రడ్ మిల్లు మీద నడుద్దామని (ఆపని ఎలాగూ చెయ్యము అది వేరేసంగతి) మాకు మేమే (నేనూ నా భార్య) సర్దిచెప్పుకుని బెంచీ మీద కూర్చుండిపోయాము.
❤️ సెలవులిచ్చిన బడిపిల్లల పరుగులు కేకలు, వాళ్ళని తీసుకువచ్చిన అమ్మమలు తాతయ్యల తీరుబడి కబుర్లు, 
ఒంటరిగా వచ్చిన వాళ్ళు గాలిలోకి ప్రశాంత ధ్యానంలా చూసే చూపులు, ఆగాగి కదులుతున్న ఆకులు….గొప్పగా వుంది ఆంబియన్స్. ఒకరినొకరు ఆనుకుపోయి కూర్చుని స్వీట్ నధింగ్స్ చెప్పుకునే యువజంటలు కనబడలేదు. 
ఇంతటి రద్దీ వారికి అసౌకర్యమే! 
❤️ ఆకులతోపాటు వాటిని ఆశ్రయించి వున్న చిన్న పురుగులు కూడా ఆనంద నాట్యం మొదలుపెట్టాయి. ఇళ్ళలోనే మగ్గిపోయే మన శరీరాలకు పురుగులడేన్సు దురదపుట్టిస్తుంది కదా! 
❤️ ఆదశలోనే ఇంటికి వచ్చేశాము. స్నానంతో స్ధిమిత పడి ఎసి కేసి చూస్తే ఓ క్షణం చికాకనిపించింది. పార్కులో కదులుతున్న చెట్ల ఆకులే కళ్ళముందు కనిపించాయి. నా చికాకుని చూసి ఎసి అలిగిందా అన్నట్టు ఆన్ చేయగానే కరెంటు పోయింది…ఎప్పుడు వస్తుందో తెలియదు…కానీ తప్పక వస్తుంది…ఈ రాత్రే!