Search

Full Story

All that around you

Category

ఆలోచనలు

Thought Processing

ఓటు నోటు రగడఒక పౌరుడి స్పష్టీకరణ


నోటుకి ఓటు తగాదాలో ” ఇది తనను ఎన్నుకున్న 5 కోట్లమందినీ అవమానించడమే” నన్న ఆంధ్రప్రదేశ్ ముఖ్యమంత్రి చంద్రబాబు నాయుడు అభిప్రాయంతో నాకు సంబంధం లేదనీ, ఆ అభిప్రాయంతో విభేదిస్తున్నాననీ స్పష్టం చేస్తున్నాను. 

ముఖ్యమంత్రి ప్రస్తావించిన కోట్లమందిలో నేనూఒకడిని అయివున్నందున ఈ వివరణ ఇవ్వవలసి వచ్చింది. కాంగ్రెస్ ఏకపక్షంగా విభజించిన రాష్ట్రంలో నేను నివశిస్తున్న ఆంధ్రప్రదేశ్ కు న్యాయం చేస్తారన్న ఆశతో తెలుగుదేశం బిజెపి కూటమికి నేను ఓటు వేసిన మాట వాస్తవమే ఆదేవిధంగా నాబంధుమిత్రులను ప్రోత్సహించిన మాటా నిజమే!
ఓటూ నోటూ తగాదాలో పట్టుబడిపోయిన తెలుగుదేశం మీద కోపమేమీలేదు…ఓట్లు కొనిగెలవగల గెలుపుగుర్రాలనే (మనుషులు కారన్నట్టు) అన్నిపార్టీలూ పోటీకి నిలుపుతున్నపుడు టిఆర్ఎస్ నుంచో, తెలుగుదేశం నుంచో నీతినియమాలను ఆశించే పరిస్ధితిలేదు. 

నానారకాల ఆకర్షణలతో కెసిఆర్ కట్టుబాటుని తెగ్గొట్టారు. డబ్బెట్టి అదేపనిచేయబోయిన చంద్రబాబు దొరికిపోయారు. దీనినుంచి బయటపడటం ఆయన సమస్య, ఆయన పార్టీ సమస్య. చంద్రబాబు ఏదో ఉక్రోషపుఫ్లోలో అనేసినట్టు ఇది ఐదుకోట్ల మంది ప్రజల విషయం కానేకాదు. ఆప్రజల్లో నేనుకూడా ఒకడిని అయి వున్నందువల్ల ఈ ప్రకటన చేయవలసివస్తోంది. 
కెసిఆర్ చర్య చట్టవిరుద్దమూ అన్యాయమూ అయితే తెలుగుదేశంవారు ఉద్యమాలు సత్యాగ్రహాలు చేసి జైళ్ళునింపేసి ప్రజల సానుభూతి మద్దతు కూడగట్టుకోవచ్చుకదా! 

టివిల్లో అరచిపెడబొబ్బలు పెడుతున్న తెలుగుదేశం నాయకుల మాటలు యాక్షన్ సినిమాల్లో ఈలలు, కేకలుగానే కనబడుతున్నాయి. వీటివల్ల ఏప్రయోజనమూ వుండదు. సినిమా అయిపోగానే వెళ్ళిపోయే ప్రేక్షకులకు, టివికేమేరా మూసుకుపోగానే బట్టలు సవరించుకువెళ్ళిపోయే ఈ నాయకులకూ తేడావుండదు. పైగా అవాకులూ చెవాకులు మనకి బోనస్. తనను అరెస్టు చేస్తే తెలంగాణా ప్రభుత్వానికి అదే ఆఖరిరోజని స్వయంగా ముఖ్యమంత్రే ఆవేశపడిపోయాక, ఆయన సేన ఎన్ని కుప్పిగంతులైనా వేస్తుంది మరి. 
దొరికేవరకూ అందరూ దొంగలే! ఓటు నోటు రగడవల్ల ఒక ముఖ్యమంత్రే గిలగిలలాడిపోవలసివచ్చిన ప్రజాస్వామిక స్ఫూర్తిని నిలిపే చట్టాల్ని స్వాగతిస్తున్నాను

ఇష్టారాజ్యాలకు అడ్డుకట్ట పడవలసిందే !


ఇష్టారాజ్యాలకు అడ్డుకట్ట పడవలసిందే !
మంచో చెడో కాంగ్రెస్ కూడా వుండవలసిందే !!
(శనివారం నవీనమ్)

రైతులకు భూమిపై ఉన్న హక్కును తొలగించే నిబంధనను అంగీకరించే ప్రసక్తే లేదని కాంగ్రెస్‌తోపాటు ఇతర ప్రతిపక్షాలు కూడా స్పష్టం చేయటంతో భూ సేకరణ బిల్లు విషయంలో ఎన్‌డిఏ ప్రభుత్వం నిస్స హాయంగా ఉండిపోవలసి వచ్చింది.

ఎన్నికల్లో నెగ్గడానికి నోరు అదుపుతప్పి అబద్ధాలు చెప్పే రాజకీయపార్టీలు అధికారంలోకి రాగానే వాస్తవాలు తెలిసొచ్చి మాటలమాయ మొదలు పెడతాయి…అయినా అధికారంవల్ల తలకెక్కిన అహంకారం కిందికిదిగదు…ప్రజాభిప్రాయాన్ని ప్రతిపక్షాల విమర్శల్నీ పక్కన పడేసి సొంత ఇష్టాలకు చట్టాలు చేసేస్తాయి. కాంగ్రెసైనా, తెలుగుదేశమైనా ఏపార్టీ అయినా ఇంతే…ప్రతిపక్షాలు సమర్ధంగా ఎదుర్కొన్న ప్రతీసారీ ఇబ్బందిలో పడిపోతాయి. ఈ సారి ఈ అవస్ధ బిజెపికి వచ్చింది. పది నెలలకే ఇలా ఇరుక్కుపోవడం పెద్దమొట్టికాయే! అందరినీ కలుపుకునే ముందుకిపోవాలన్న పాఠమే!!

ఇలాంటి సందర్భాలు ప్రజాస్వామ్య స్పూర్తిని పటిష్టపరుస్తాయి. చట్టాల రూపకల్పనలో బిజెపి దూకుడుని ఏకపక్ష ధోరణిని నిలవరించడంలో కుంగిపోయివున్న కాంగ్రెస్ చొరవ, సకల ప్రతిపక్షాల ఐక్యతా మంచిఫలితాన్నే ఇచ్చాయి.

బడ్జెట్‌ సమావేశాల్లో బిజెపి నేతృత్వంలోని ఎన్డీఏ ప్రభుత్వం తాను కోరుకున్న బిల్లులకు చట్టరూపం ఇవ్వటంలో దారుణంగా విఫలమైంది. ప్రభుత్వం చట్టరూపం ఇవ్వాలనుకున్న భూసేకరణ సవరణ బిల్లు, జిఎస్‌టి బిల్లు, రియల్‌ ఎస్టేట్‌ బిల్లులను రాజ్యసభలో నిలువరించి సంయుక్త సెలెక్ట్‌ కమిటీ, సెలెక్ట్‌ కమిటీలకు పంపించటంలో కాంగ్రెస్‌ పార్టీ, వామపక్షాలు, ఇతర విపక్షాలు విజయం సాధించాయి.

లోక్‌సభ ఎన్నికల్లో కేవలం నలభై నాలుగు సీట్లు గెలిచి చావుదెబ్బ తిన్నదనుకున్న కాంగ్రెస్‌ పార్టీ బుధవారం ముగిసిన బడ్జెట్‌ సమావేశాల్లో ఎన్డీఏ ప్రభుత్వంపై ఎదురుదాడి చేయటంలో విజయం సాధించించింది. నాయకుడే కాదని, కాలేడని విమర్శలపాలౌతున్న  కాంగ్రెస్‌ పార్టీ ఉపాధ్యక్షుడు రాహుల్‌ గాంధీ 56 రోజుల రాజకీయ అజ్ఞాతవాసం తరువాత ఊహించని స్థాయిలో పార్లమెంటులో ప్రభుత్వంతో ఆటాడుకున్నారు. 

గత 24 సంవత్సరాలలో ఏ పార్టీకీ లోక్‌సభలో ఇన్ని స్థానాలు రాలేదని విజయగర్వంతో చెప్పిన బిజెపికి, ప్రత్యేకించి పార్లమెంటు సమావేశాల నిర్వహణ సమయంలో విపక్షాలు వారికి చుక్కలు చూపిస్తున్నాయి. లోక్‌సభలో మెజారిటీ ఉంటే చాలదు రాజ్యసభలో కూడా మెజారిటీ అవసరం కొంచెం ఆలస్యంగా బిజెపికి అర్ధమైంది.

ఈ సారి రెండు విడతలుగా జరిగిన పార్లమెంటు బడ్జెట్‌ సమావేశాలలో బిజెపి తీవ్రమైన ఇబ్బందిని ఎదుర్కొన్నది. అధికారంలోకి వచ్చిన తొలి రోజుల్లో జరిగిన సమావేశాలకు ఇప్పటికి బాగా తేడా కనిపించింది. కీలకమైన, ప్రతిష్ఠాత్మకమైన బిల్లులను పార్లమెంటు గట్టెక్కించలేక బిజెపి నానాతంటాలు పడాల్సివచ్చింది.

ఎన్డీఏ ప్రభుత్వం మూడు ప్రధాన బిల్లులకు పార్ల మెంటు ఆమోదముద్ర వేయించుకునేందుకు తీవ్రంగా ప్రయత్నించినా విజయం సాధించలేకపోయింది. ప్రధాని మోడీ అయితే భూసేకరణ బిల్లు, జిఎస్‌టి బిల్లు, రియల్‌ ఎస్టేట్‌ బిల్లులకు ఏదో విధంగా పార్లమెంటు ఆమోదం తీసుకోవాలనుకున్నారు.

అయితే రాజ్యసభలో ప్రతిపక్షానికి మెజారిటీ ఉండట తో ఈ మూడు బిల్లులూ సెలెక్ట్‌ కమిటీకి వెళ్లకతప్పలేదు. కాంగ్రెస్‌ పార్టీ నేతలు, మరీ ముఖ్యంగా రాహుల్‌ గాంధీ భూసేకరణ బిల్లును అడ్డుకోవటం ద్వారా మళ్లీ రాజకీయంగా పుంజుకోగలిగారు. జిఎస్‌టి బిల్లుకు పార్లమెంటు ఆమోదం తీసుకునేందుకు కేంద్ర ఆర్ధిక మంత్రి అరుణ్‌ జైట్లీ చేసిన ప్రయత్నం కూడా విఫలమైంది. ఈ బిల్లుపై పన్నెండేళ్లుగా చర్చ జరుగుతున్నందున బడ్జెట్‌ సమావేశంలో ఆమోద ముద్ర పడుతుందని అధికార పక్షంలోని అందరూ భావించారు. ప్రతిపక్షం కూడా మొదట్లో కొంత మెతకవైఖరి అవలంబించినా ఆఖరున ఎందుకో మనసు మార్చుకుంది.

వచ్చే ఏప్రిల్‌ నుంచి ఏకీకృత పన్ను వసూలు చేసేందుకు వీలుగా బిల్లును ఆమోదించాలని, లేకుంటే మరో ఏడాది ఆగాల్సి వస్తుందని ఆర్ధిక మంత్రి ప్రాధేయపడ్డా కూడా విపక్షం కనికరించలేదు. ఎన్డీఏ ప్రభుత్వం ఏకపక్షంగా వ్యవహరిస్తోందన్న ఆరోపణతో ప్రతిపక్షం ఈ బిల్లును సెలెక్ట్‌ కమిటీకి పంపించ గలిగింది. రియల్‌ ఎస్టేట్‌ బిల్లు విషయంలో కూడా అదే జరిగింది. ఎన్డీఏకు మెజారిటీ ఉన్న లోక్‌సభలో బిల్లులను ఆమోదింపజేసుకున్నా రాజ్యసభలో ప్రతి పక్షానికి మెజారిటీ ఉండటంతో గడ్డు పరిస్థితులు నెలకొన్నాయి. ప్రతిపక్షం అంగీకరించిన బిల్లులకు మాత్రమే సభ ఆమోదం లభించించి చట్ట రూపం దాల్చాయి.  బంగ్లాదేశ్‌తో సరిహద్దులను ఖరారు చేసుకునే రా జ్యాంగ సవరణ బిల్లుదానికి ఓ ఉదాహరణ. అదే విధంగా ప్రతిపక్షం సహకరిం చేందుకు అంగీకరించటం వల్లనే నల్లధనం బిల్లుకు ఆమోదం లభించింది.

బడ్జెట్‌ సమావేశాల మొదటి విడతలో లోక్‌సభకు హాజరు కాకుండా అజ్ఞాతంలోకి వెళ్లిపోయిన రాహుల్‌గాంధీ కాంగ్రెస్‌ పార్టీని ఇబ్బందుల్లో పడవేశారు. అయితే రెండో విడత సమావేశాలు ప్రారంభమయ్యేనాటికి ప్రత్యక్షమైన రాహుల్‌ గాంధీ కొత్త సామర్థ్యాన్నిచూపించారు. భూసేకరణ బిల్లు, అంతర్జాలం (ఇంటర్నెట్‌)పై తటస్థ వైఖరి, అమేథీ ఫుడ్‌ పార్క్‌, రియల్‌ ఎస్టేట్‌ బిల్లు అంశాలపై ప్రభుత్వంపై ఎదురు దాడి చేసి ఇరకాటంలో పడవేయడంలో ఆయన కీలకపాత్రపోషించారు.

లోక్‌సభలో కూడా ప్రతిపక్షాలు కలిసికట్టుగా వ్యవహరించటంతో ప్రభుత్వం పలుమార్లు ఇరకాటంలో పడింది. కాంగ్రెస్‌ నాయకులు, ముఖ్యంగా సభలో ఆ పార్టీ నాయకుడు మల్లికార్జున ఖర్గే ఓ దశలో స్పీకర్‌ సుమిత్రా మహాజన్‌పై సైతం పరోక్షంగా ఆరోపణలు చేశారు. పార్లమెంటరీ వ్యవహారాల శాఖ మంత్రి వెంకయ్యనాయుడు ప్రతిపక్షాన్ని ఎదుర్కొనేందుకు గట్టిగా ప్రయత్నించినా పెద్దగా ఫలితం లేకపోయింది. మొత్తం మీద ప్రతిపక్షం ఎదురు దాడిని తిప్పికొట్టటంలో అధికార పక్షం విజయం సాధించలేదు. నల్లధనం విషయంలో ప్రభుత్వం చిత్తశుద్ధితో ప్రయత్నించడం లేదని బిజెపి బహిష్కృత నేత రాంజెఠ్మలానీ ఆరోపించడం కూడా బిజెపికి మింగుడుపడే విషయం కాదు. నల్లధనంపై జరిగిన చర్చలో ఆయన మాట్లాడుతూ బిజెపి నాయకత్వంపై, ప్రభుత్వంపై తీవ్ర విమర్శలు చేశారు. ప్రధాని మోడీ పేరు ప్రస్తావించకుండా ఆయన సర్కార్‌ ఘోరంగా విఫలమైందని ధ్వజమెత్తారు.

అంతర్గత అసమ్మతికి ఇదొక నాంది కూడానేమో!! 

 

నిన్నొక డేటాగా మార్చేసి, నీ ఉనికిని నీకే అమ్మే నావిగేటరు(ఇదేదో భయంగా వుందే!)


ఎక్కడికి వెళ్ళాలో చిరునామా చెబితేచాలు…అదే క్షణాల్లో వెతికేసి అన్నిదారులనూ దూరాలనూ, సుమారుగా చేరేసమయాలనూ కళ్ళముందు పరుస్తుంది. ఏదో ఒకదారి ఎంపిక చేసుకుని బయలు దేరడమే తరువాయి…రెండొందల మీటర్లలో ఎడమకి తిరగాలి…ఎనిమిది వందల మీటర్లు నేరుగా వెళ్ళాలి…వచ్చే సర్కిల్ లో మూడో రోడ్డులో ఎగ్జిట్ అవ్వాలి…ఇలా ముందస్తు సూచనలు ఇస్తూ గమ్యానికి చేరుస్తుంది.

వన్వేల నగరంలో వెనుకవాహనానికి ఇబ్బంది లేని చోటుని వెతుక్కోవడమే కష్టం…ఓ ఖాళీ చోట్లో కారు ఆపి అడ్రస్ అడుగుదామంటే వెసులుబాటున్న మనుషులు దొరకడం మరీ కష్టం…ఎవరో కష్టపడి చెప్పినా అది బుర్రకెక్కడం కనా కష్టం. ఇన్ని కషా్టల మధ్య పదికిలోమీటర్ల ప్రయాణానికే రెండు గంటలు పడితే తొందరగా చేరుకున్నట్టే .

మనిషికి ఉపయోగపడటానికే సమాచార సాంకేతిక పరిజ్ఞానం అనుకోవడం బాగుంది. Map My India అన్నపేరుకూడా కొంత దేశభక్తి పూర్వకంగానే వున్నట్టుంది. సెల్ నెట్వర్కులతో సంబంధంలేని గ్లోబల్ పోజిషనింగ్ సిస్టమట…ఆకాశం గొడుగుకిందనువ్వెక్కడున్నా నిన్ను చూసేసి, నిన్నొక డేటాగా మార్చేసి, నీ ఉనికిని నీకే అమ్మే నావిగేటరట… 

ప్రయాణం సాగినంత సేపూ దారిచూపడానికి ఇది నేను కొనుక్కున్న బానిన అని సంబరమనిపించినా, నిన్నూ-నన్నూ తదేకంగా చూస్తున్న యాంత్రిక నేత్రాలంటే భయమేస్తూంది. అంతరిక్షం నుంచి నాసా కన్ను…ఇంటర్నెట్ అంతటా గూగుల్ కన్ను…కూడలి ప్రాంతాల్లో ఖాకీ కన్ను, అంగళ్ళలో వ్యాపారుల కన్ను…నీ గుప్పెట్లో సెల్ ఫోన్ కన్ను…కనుచూపు మేరంతా రెప్పలార్పని ఎలకా్ట్రనిక్ కన్ను…

ఇన్ని కళ్ళు చూసే వాటిలో రియాల్టీ షోలు కొన్ని లైవ్ టెలికాస్టులే అన్నీ…దారిచూపించే కంటికి నీతి లేకపోతే ఆదమరచిన సెలబ్రెటీ బట్టలు వోలిచేస్తుంది. నమ్మిన ప్రియురాల్ని దిగంబరంగా నెట్ లో పెట్టేస్తుంది… సరే! ఎలాగోలా ఈ కళ్ళను మాయచేయవచ్చు…హరించబడిన ప్రయివెసీని తుడిచి పెట్టవచ్చు!!

ఈ అక్షరాలు, ఫోటోలు, వీడియోలు, ఫోన్ లో మాట్లాడిన మాటలు, ఇలాంటి డేటాను మనం డిలిట్ చేసేయవచ్చు. అసలు మన అడౌంట్లను మనమే ధ్వంసం చేసుకోవచ్చు…..

అయినా ఆ డేటా అంతా వేర్వేరు సర్వర్లలో అలాగే వుండిపోతుంది.

అర్ధం కాలేదా? అలా పోగులు పడిపోయిన డేటాను క్రోడీకరించి, సెర్చ్ ఇంజన్లు గుర్తించ డానికి పేర్లు పెట్టి క్షణాల్లో మనం అడిగింది చూపిస్తున్న గూగుల్ మన  అనుభవమే కదా?

గూగుల్ లాంటి మహా మహా సర్వర్లు దాచివుంచుతున్న డేటా నీటి సముద్రాలకు మించిన డేటా సాగరాలైపోతూండటం….కంటికి కనిపించని డేటా నిక్షేపాల పై హక్కులెవరివి? ఎవరు డేటాను నిర్వహిచాలి? మహా సర్వర్ల యాజమాన్యాలే డేటాను సొంతం చేసేసుకుంటే వాటి సృష్టికర్తలైన మనుషుల సృజన కు ఈ టెక్నాలజీ ముందు పేటెంటు హక్కులు నిలుస్తాయా? మొదలైన ప్రశ్నలకు సమాధానాలు లేవు!

అంతెందుకు నేను రాసిన ఈ డిజిటల్ అక్షరాల మీద హక్కు నాదేనా! మీరూ, నేనూ డిలిట్ చేశాక కూడా డేటా వుండిపోయిన సర్వర్ల నిర్వాహకులవా?  

 












మనిషి ముగ్దుడైపోవటం అనుభవమయ్యింది! 


మనిషి ముగ్దుడైపోవటం అనుభవమయ్యింది! 

ఇరవైరెండు లక్షల ఎకరాల్లో నిత్య దుర్భిక్షాన్ని పచ్చటి బతుకుగా మార్చడానికి నందికొండలోయలో నీటి చెలిమై ఆగిన కృష్ణమ్మను చూశాక ఒక కృతజ్ఞతతో మనసు పొంగినట్టు అనిపించింది. 

నాగార్జునసాగర్ ప్రాజెక్టుని ముప్పైఏళ్ళక్రితం పుట్టిన ఆశ నిన్నతీరింది. ప్రాజెక్టు ఎడమకాల్వ కింద గుంటూరు ప్రకాశం జిల్లాలో చివరి భూములకు నీరందని అవకతవకలపై 1982 లో చీఫ్ ఇంజనీరు శ్రీనివాసరావుగారు విచారణ చేయగా నేనూ ఫాలో అయ్యాను. చాలావార్తలు రాశాను. ఎంక్వయిరీ రిపోర్టులో ఆ వార్తల్ని కూడా ఉటంకించారు. అసెంబ్లీలో పెద్ద దుమారమైంది. 27 మంది ఇరిగేషన్ ఇంజనీర్లు సస్పెండయ్యారు. ఆ సమయంలోనే సాగర్ ప్రాజెక్టుని చూడాలనిపించింది. అది ఇప్పటికి నెరవేరింది. 

ఈ ప్రాజెక్టు నిర్మాణానికి మక్తా్యల రాజాగారు, ఖోస్లాగారు చేసిన కృషిగురించి చీఫ్ ఇంజనీర్ శ్రీనివాసరావుగారు చెప్పిన మాటలు చెవిలో వినిపిస్తున్నట్టే వున్నాయి. 

కృష్ణనీ పెన్ననీ కలిపి తమిళనాడు తరలింకుచుకు పోవాలని ప్రతిపాదించింది.నిజాం నవాబు తన రాజ్యంలోనే కష్ణపై ఆనకట్ట కట్టించే అవకాశాల్ని అధ్యయనం చేయించినపుడు నల్గొండజిల్లా నందికొండ అనువైనదని తేలింది. ఆనివేదికతో మక్తా్యల రాజాగారు ముందడుగువేసి స్వయంగా ఊరూరూ తిరిగి ప్రజల సంతకాలతో ప్రాజెక్టు డిమాండును ప్రభుత్వం ముందుంచారు. సొంత డబ్బు జీలాలిచ్చి సర్వే చేయించారు. ఇష్టం లేని మద్రాసు ప్రభుత్వం కాలయాపన ఉద్దేశ్యంతో ఖోస్లా కమిటీని వేసింది. దారీ డొంకాలేని నందికొండకు వెళ్ళెదెలా? ఏమీ చూడకుండానే పా్రజెక్టుని ఆమోదించేదెలా అని ఖోస్లా ప్రశ్నించినపుడు, రాజాగారు 25 గ్రామాల ప్రజల్ని కూడగట్టి రేయింబవళ్ళు శ్రమదానం చేయించి కచ్చారోడ్లు వేయించారు. ఖోస్లా కమిటీ నందికొండను చూసి ప్రాజెక్టు నిర్మాణానికి ఇంతకు మించిన చోటు వుండదనీ, ఇది దేవుడు మీకిచ్చిన గొప్పవరమనీ అన్నారట. ఆవిధంగా మంజూరైన ప్రాజెక్టుకి 1955 లో నెహ్రూగారు శంకుస్ధాపన చేశారు. 1969 లో నిర్మాణం పూర్తయింది. 

వేసవికనున ఇరవై ఆరు గేట్లూ మూసివున్న డ్యాము ఎత్తుని గంభీరతనీ చూస్తే సృష్టిలో చైతన్యానికి మనిషికి మించిన రూపం ఇంకేముందని వెంటు్రకలు నిక్కబొడుచుకుంటున్నట్టు వుంటుంది. జీవనదిని ఆపిన మనిషి మేధస్సుకి సముద్రంలోతైనా అందుతుందా అని అబ్బురమనిపిస్తుంది. ప్రకృతికి అర్ధంచేసుకుని సాగే మనిషి ప్రయాణం ఎప్పటికీ ఆగదని నిబ్బరమొస్తుంది. ప్రాజెక్టిని ప్రజలకిచ్చిన రాజాగారు, నిజాంగారు, నెహ్రూగారు, కెఎల్ రావుగారు ప్రొఫెసర్ ఎన్.జి.రంగా గారు, మోటూరు హనుమంతరావుగారు,  కొత్త రఘురామయ్యగారు మొదలైన మహాను భావుల పట్ల కృతజ్ఞతతో హృదయంలో చెమ్మగిల్లుతుంది. 

ప్రాజెక్టు దిగువ నదీగర్భంలో బండరాళ్ళు, ఎండు నేలా – మాయావుల పట్ల కృష్ణమ్మ ఆగ్రహంలా వున్నాయి. గ్రీష్మరుతువు ఇంతే కఠినమని గుర్తు చేస్తున్నట్టున్నాయి. 
అయినా, కరువుతో గుండె చెరువైనవారిని చూసి ఆతల్లి కరిగిపోతుంది. ఎండిన నేలనొకసారి పలకరించి, మనిషి, మేక, పశువూ తేడా లేకుండా నోరెండిన ప్రతిప్రాణి గొంతూ తడుపుతుంది.

మరి, కృష్ణవేణంటే నీరుకదా! నీరంటే అమ్మ కదా!!

పాటలేని రోద 


కుటుంబ సందర్భాలు, వ్యక్తిగత సమయాలు, బహుశ పసితనపు కలలకూడా మార్కెట్ అయిపోయాయని అర్ధమౌతోంది. నగర జీవితమంటే పాట లేని రొద అనిపిస్తోంది.

నిన్న ఒక ఐ కేర్ సెంటర్ లో వేచి వున్నపుడు అక్కడున్న 26 మందిలో 17 మంది టెక్టి్సంగ్ లోనో కాలింగ్ లోనో కనిపించారు. ఇన్ ఆర్బిట్ మాల్ లో ఒక ఫుడ్ కోర్టులో తండ్రి వాయిస్ కాల్ లో, తల్లి డేటా కాల్ లో, చిన్నారి ఎలకా్ట్రనిక్ కారు రేసులో, వారు తినవలసిన ఫుడ్ పిచ్చి చూపులతో…

ఇదంతా కనిపించని పరుగులా వుంది…ఇందులో సహజమైన ఆనందం ఏదో మిస్ అయినట్టుంది…ఇదంతా అనుభవంలా లేదు…ఏదో వెంపర్లాటలా వుంది.

నా భార్య అన్నట్టు ఒక జీవనశైలిని వ్యాఖ్యానించడానికి నేనెవరిని? నా చేతి దురదని మీరు మన్నించాలి

ఇపుడు ఒక మాట మీకు తప్పక చెప్పాలి…గోదావరి జిల్లాలను “అమరావతి”గా మార్చాలన్న ఆలోచన రాని చంద్రబాబుగారికి నేను రుణపడి వున్నాను.
గమనిక : నేను అభివృద్ధి నిరోధకుణ్ణికాదు… బిడ్డ ఎదుగుదల సమతౌల్య పౌష్టికాహారంతోనే తప్ప స్టెరాయిడ్స్ తో కాదన్నదే నా అరణ్య రోదన 

(హైదరాబాద్ లో రెండో రోజు ఆలోచనలు – బుధవారం శుభోదయం) 

నిస్సహాయులు ఏమిచేస్తారు 


వ్యాపారానికి ఆకలి బానిసైనపుడు ముడుపులు అందుకుని తటస్ధత నటించిన యంత్రాంగం ఆకస్మికంగా ఆయుధాన్ని అందుకుని ఆకలినే కాల్చేసిన బీభత్స నాటకంలో అచేతన మూలుగైపోయింది. ఆగనిరోదనైపోయింది..

ఆరుతడికి కూడా గతిలేని రెండో పంట కాలంలో నెత్తుటి ఊటమొదలైంది. చుట్టూ ఇరవై కళేబరాలను పరచుకుని రక్తసింహాసనం మీద కొత్త ఏలుబడి మొదలైంది
ఈతచాపలో చుట్టినా, భయపెట్టడానికి కోటగుమ్మానికి కట్టినా, వాడి శరీరం ప్రశ్నిస్తూనే వుంటుంది

ధర్మగంటలు మోగని పాలన, హృదయం లేని ప్రభువు, సానుభూతి నరంతెగిపోయిన సభ్యసమాజం ఎక్కడా వర్ధిల్లకూడదు. మూసినగుమ్మం ముందు పడిగాపులు పడవలసి రోజుల ఎవరికీ రాకూడదు పెద్దలే పిల్లలకు తలకొరివి పెట్టేరోజులు ఎప్పుడూ వుండకూడదు. 

స్మగ్లర్లని అదుపుచేయడం చేతకాక కూలీలలు కాల్చేసిన ఎన్ కౌంటర్ లో ఇరవై మంది చచ్చిపోవడంకంటే ఒక పూనకంగా దీన్ని సమర్ధిస్దున్న ప్రజల సంఖ్య పెరిగిపోతూండటమే దిగులుగా వుంది. మానవీయ విలువలకు చెదపట్టేస్తున్నంత భయంగా వుంది. ఇవాళ చట్టాన్ని వ్యక్తుల చేతుల్లో పెట్టేస్తే అదే రేపు ప్రజాస్వామ్యం గొంతు నొక్కేస్తుందన్న స్పృహలేకపోవడం బాధిస్తోంది.

నిస్సహాయులు ఏమిచేస్తారు నడిరోడ్డు మీద నిలబడి శాపనార్ధాలు పెడతారు…ఏడుదోసిళ్ళ దుమ్ము ఎత్తిపోస్తారు…(ఈపోస్టు అదే) 

ఏలినవారి హింస ! 


నిజమైన ఎన్ కౌంటర్ వల్ల వెల్లువెత్తిన ఉద్వేగాల్ని ఊతం 
చేసుకుని వరుస హత్యలనే పరిపాలనా చర్యలుగా చేపట్టిన 
కెసిఆర్, చంద్రబాబు ప్రభుత్వాల 
నెత్తుటి చేతుల్లో మృగదశ అవశేషాలు భయపెడుతున్నాయి! 

ప్రాణరక్షణ హక్కుని ప్రాణంతీసే పనికి వుపయోగించుకునే ధోరణిని ప్రజలు నిలదీయకపోతే నచ్చనివారిని తొలగించుకుంటూ పోయే గూండాయిజాన్ని ప్రభుత్వయంత్రాంగానికి ఆయుధంగా ఇవ్వడమే…డెడ్ ఎండ్ అంటూ గోడ ఎదురైనపుడు పాలక-యంతా్రంగాల్లో తలెత్తే నిస్పృహ, అనాగరిక, పాశవిక నీతినే పాటిస్తూండగా, అరాచకాన్ని నిర్మూలించడానికి అదే అరాచకాన్ని ఆశ్రయిస్తూండగా, ఏలినవారే హింసాపిపాసులైపోతూండగా అదే గొడుగుకిందవున్న మనది నాగరీక సభ్య సమాజమని సంతృప్తిగా భావించుకోగలమా? 

నెత్తుటికూడు వెగటైన సామా్రట్ అశోకుని వలే మన ఏలికలు ఎప్పటికైనా పశ్చాత్తాపపడతారా? 

(కంటికి కన్ను ప్రాణానికి ప్రాణం అని వాదించే వారికి ఒక నమస్కారం) 

గ్యాస్ సబ్సిడి మన హక్కు! వదులుకోవద్దు!!


గ్యస్ సబ్సిడీని స్వచ్ఛందంగా వొదులుకోవాలన్న భారత ప్రధాని నరేంద్రమోదీ పిలుపును నేను వ్యతిరేకిస్తున్నాను. ఖండిస్తున్నాను.

ప్రపంచ పోలీసులకు లోకమంటే సహజవనరులే!  ఇరాక్ అంటే అమెరికాకు పెటో్రలే! ఇండియా అంటే వాస్కోడిగామాకు మిరియాలు ఏలకులే! వెస్టిండీస్ అంటే కొలంబస్ కి బంగారపు ముద్దే! కృష్ణా గోదావరి బేసిన్ అంటే కార్పొరేట్లకు కోటానుకోట్ల నిక్షేపాలే!

ప్రకృతిలో కలసిపోయి అందులో వనరుల్ని వినియోగించుకుంటూ, పునర్జీవింపజేసుకుంటూ జీవించే మనిషికే ఆ వనరుల మీద అధికారం వుండాలన్నది సహజసూత్రం. ముందు బతుకుదారులకోసం, తరువాత కొత్తమార్కెట్లకోసం యూరోపియన్ల అన్వేషణతోనే ఈ సూత్రం చితికిపోవడం మొదలైంది. వనరులు తరలించుకుపోడానికి సాగిన వలసలే సామా్రజ్యీకరణై యుద్ధాలై, పతనాలై చరిత్రలో కలసిపోయాయి. 

ఇపుడు కనిపించేది వేరు, జరిగేది వేరు అంతర్జాతీయ సదస్సులు, నిర్ణయాలు, తీర్మానాలూ మహా ఉదాత్తంగా కనిపిస్తాయి. ఆవెంటనే బొగ్గుగనులు పరదేశీ కార్పొరేట్ల లీజుకి వెళ్ళిపోతాయి. గ్యాస్ నిక్షేపాలు విదేశీ ఒప్పందాలు కుదుర్చుకున్న అంబానీలకు దాదాదత్తమైపోతాయి. ఇది జులుమో దౌర్జన్యమో లేని హైటెక్  సామా్రజ్యీకరణ. ఇది మనిషి కళ్ళగప్పే ప్రపంచీకరణ. దీని వేగం ప్రపంచ ప్రభువులు తోడుకునే వేగాన్ని బట్టీ, స్ధానిక సామంతుల ఊడిగపు మోజూ, విధేయతలనుబట్టీ, దళారుల దురాశనుబట్టీ వుంటుంది. 

జలవనరులు, అటవీసంపదలు, భూగర్భనిక్షేపాల వినియోగంలో పాలకులు స్ధానిక ప్రయోజనాలకు ప్రాధాన్యత ఇచ్చివుంటే దేశంలో ఇన్ని ప్రాతీయ అసమానతలు వుండేవికాదు. 

ఓబుళాపురం గనుల గొడవ మనకెందుకులే అన్న ముఖ్యమంత్రి రాజశేఖరరెడ్డి రిలయెన్సును దారికి తెచ్చుకోడానికైనాగాని ‘ఈ నేలనాదిరా, ఈ గ్యాస్ నాదిరా’ అనే పిలుపునకు దోహదపడ్డారు. వారం రోజులు కూడా సాగని ఈ ఉద్యమంలో నేనూ నినదించాను…ఊరేగాను.

ఆంధ్రప్రదేశ్ అవసరాలు తీరాకే కృష్ణాగోదావరి బేసిన్ లో చమురు, సహజవాయువులను ఇతర చోట్లలో అమ్ముకునేలా రిలయెన్స్ ని శాసించడమే ఆ ఉద్యమ ప్రయోజనం. శాసించడం మాటెలా వున్నా కనీసం ప్రాధేయపడటానికైనా పాలకులకు అందనంత ఎత్తున అంబానీలు వున్నారు.

సహజవనరుల వంటి మౌలిక రంగాలను ప్రయివేటీకరించడమే తప్పు. ఆతప్పు ఇప్పటికే జరిగిపోయింది. కనీసం ప్రయివేటీకరణ ఫలాలను ప్రజలకు నేరుగా అందేలా చూడటమైనా ప్రభుత్వాల వల్ల కావటంలేదు. 

కూరగాయల బండివాడో కిరాణా కొట్టువాడో చిల్లర లేకపోయినా డబ్బుతక్కువైనా ఫర్లేదు రేపివ్వండి సార్ అంటారు. అలాంటి నావాళ్ళకోసం  స్పందిస్తాను. పైసా తక్కువైనా కర్సరే కదలకూడదని కంటికి కనబడకుండా శాసించే హైటెక్ వ్యాపారి తనలాభాల్లో ఎంత తగ్గించుకుంటాడో ప్రకటించగలిగితే నేను కూడా గ్యాస్ సబ్సిడీని రద్దు చేయించుకుంటాను.

ఇప్పటికే కాకుల్ని కొట్టి గ్రద్దలకు వేసేశారు. ఇపుడు కాకుల నోటికందిన కొద్దిపాటి ఇంధనాన్ని కూడా త్యాగం చేయమంటున్నారు. ఇదేమైనా ధర్మంగా వుందా? ఇదేమైనా న్యాయంగా వుందా??

నా పెద్దలు ఇచ్చిన వారసత్వంలాగే నానేల నిక్షేపమైన గేస్ లో కూడా నా వాటా వుంది. అదే సబ్సిడి రూపంలో నాకు అందుతోంది. ఈ హక్కునికూడా త్యాగం పేరుతో లాగేసుకునే వైఖరిని ఏవగించుకుంటున్నాను. 

నేలతల్లి ఇచ్చిన కానుక గ్యాస్ మన ఆంధ్రప్రదేశ్ హక్కు. దీన్ని వదులుకోకూడదని నేను కూడా పిలుపు ఇస్తున్నాను.

నాకూ, మీకూ, బిజెపి సానుభూతిపరులకూ తెలుసు. మోదీ గారి పిలుపునకే స్పందన హెచ్చుగా వుంటుందని….మనందరికీ తెలుసు ‘గ్యాస్ సబ్సిడీ ని స్వచ్ఛందంగా వదులుకోవాలన్న పిలుపు’ ఫస్ట్ బెల్లే…మనం కూర్చున్న కుర్చీ మనకి తెలియకుండానే మాయమైపోయేటంత చల్లగా…మూడోగంట మోగాక మనకి తెలియకుండానే మన సబ్సిడీ రద్దయిపోతుందని…

అయినా కూడా, అప్పటివరకైనా కూర్చునే వుంటాముకదా! ఆలోచించకుండా వుండలేము కదా!!

మరచిపోవద్దు : ఆర్ధిక ఆరోగ్యం పేరుతో ప్రజల హక్కులను త్యాగం చేయాలనడం నియతృత్వం వైపు ప్రయాణించడమే! 

తెలుగుదేశం అవమానానికి టీచర్ల ప్రతీకారం 


”చదువుకున్నవాళ్ళు టీచర్లయిపోయారు
చదువురాని వాళ్ళు స్కూళ్ళు పెట్టేశారు”

ఇది ఒక సినిమా లో డైలాగ్ శాసన మండలిలో గోదావరి జిల్లాల ఉపాధ్యాయ నియోజకవర్గానికి జరిగిన ఎన్నికల్లో ఈ డైలాగ్ కి కొనసాగింపు కూడా వుంది… అలా కాలేజీలు పెట్టిన వాళ్ళు తమ లక్ష్యానికి అనుగుణంగా డబ్బు సంపాదించారు…అలాంటి వారిలో ఇద్దరు టీచర్ ఎమ్మెల్సీ అయిపోవాలనుకున్నారు.  ఇది టీచర్లకు మండిపోయింది…ఆ ఇద్దరినుంచీ నుంచి ‘కట్నకానుకలు’ తీసేసుకుని ఇద్దర్నీ పక్కన పడేశారు. 

విద్యాబుద్ధులు తప్ప డబ్బులేని నిజమైన టీచర్ నే గెలిపించుకున్నారు. 

పరాజితులు సరే…ఇందులో భంగపడింది తెలుగుదేశం పార్టీ…గెలుపు గుర్రాల ఎంపిక పేరుతో అర్హులను విస్మరించి ఉపాధ్యాయులను అవమానించింది. అపూర్వమైన తీరులో 84 శాతం పోలింగ్ అయినప్పుడే ఇదంతా పాలకపక్షం మీద కసేనని వెల్లడైపోయింది. 

ఘనమైన బ్రాండ్ ఇమేజి వున్న ఇంజనీరింగ్ కాలేజీల యజమానులైన కృష్ణారావు, చైతన్యరాజు టీచర్ ఎమ్మెల్సీ పదవికి తెలుగుదేశం మద్దతుకోసం గట్టి ప్రయత్నం చేశారు. ఆ అవకాశం చైతన్యరాజుకి దక్కింది. ఉపాధ్యాయసంఘాల ప్రతినిధి స్వయంగా టీచర్ అయిన సూర్యారావు తో పాటు ఈ ఇద్దరూ నామినేషన్లు వేశారు. బ్రహాండమైన ప్రచారం జరిగింది. వెండి గ్లాసులు పంచుతూ చైతన్యరాజు మద్దతుదారులు, డబ్బు పంచుతూ కృష్ణారావు మద్దతు దారులు దొరకిపోయేటంట పటాటోపమైన కేంపెయిన్ రెండు వైపులా జరిగింది. 

చైతన్యరాజు కాంగ్రెస్ లో వున్నపుడు ఎమ్మెల్సీ అయ్యారు. ఆతరువాత ఆయన పెద్దబ్బాయి ఎమ్మెల్సీ అయ్యారు. తెలుగుదేశం గెలవడంతో  వచ్చాక రాజుగారు అధికారపార్టీ వేపు ఫిరాయించారు. కొడుకు ఎమ్మెల్సీ గా వుండగా రెండోసారి తండ్రికి అవకాశమా అని విమర్శలు సొంత పార్టీనుంచే వచ్చినా చంద్రబాబు పట్టించుకోలేదు. గోదావరి జిల్లాలు బాబుని నెత్తిన పెట్టుకున్నందుకు మితిమీరిన విశ్వాసంతో బాబుగారు రాజుగారిని మాకు అంటగట్టారు అని నాలుగురోజుల క్రితమే ఒక ఎమ్మెల్యే నాతో అన్నారు. ‘మా కేండిడేట్ పోతాడు సెకెండ్ ప్రిఫరెన్షియల్ ఓటుతో కృష్ణారావు గెలుస్తాడు’ అని వ్యాఖ్యానించారు. 

ఆ సీనియర్ నాయకుడి మాటల్లో విష్ ఫుల్ ధింకింగే తప్ప ఆయన కొద్ది మంది టీచర్లతో కూడా మాట్లాడలేదని నాకు అర్ధమైపోయింది.

‘నిజమైన టీచర్’ సూర్యారావు గెలిచిన ఫలితం వెలువడిన వెంటనే చంద్రబాబు చాలా బాధ్యతగా గోదావరి జిల్లాల ఎమ్మెల్యేల మీద విరుచుకు పడ్డారు. ఏ ఒక్కరినీ వొదిలిపెట్టేది లేదని కేకలేసివుంటారు. పార్టీకోసం తానొక్కడినే ఎంత కష్టపడుతున్నదీ  సుదీర్ఘంగా తప్పక చేప్పేవుంటారు.

ఉపాధ్యాయులకు కేటాయించిన స్ధానాన్ని వారికే విడిచిపెట్టకుండా అందులోకీ సంపన్నులనే దూర్చేయడం తెలుగుదేశం తప్పు. ఏపార్టీకీ లేనంతమంది సభ్యులున్న పార్టీగా గొప్పలు చెప్పుకునే తెలుగుదేశానికి గోదావరిజిల్లాలలో ఉపాధ్యాయుల్లో సరైన అభ్యర్ధే లేరంటే అంతకుమించిన దివాళా కోరుతనమే లేదు. నిజమైన టీచర్ కే మద్దతు ఇచ్చివుంటే ఒక వేళ ఓడినా కూడా ఉపాధ్యాయుల్లోకి తెలుగుదేశం విస్తరించి వుండేది. తమ అభ్యర్ధి గెలవక ఏమౌతాడన్న తెలగుదేశం అహంకారమే ఆ పార్టీని అవమానం పాలు చేసింది. 

ఈ ఎన్నికల్లో ఓడిపోయింది తెలుగుదేశం మాత్రమే కాదు…మీడియా కూడా.
రాగద్వేషాలకు అతీతంగా విలేకరులు వాస్తవస్ధితిగతులను అంచనావేస్తారు…వెయ్యాలి…ఎన్నికల గోదాలో సంపన్నుల వున్నపుడు బలాబలాలతో నిమిత్తంలేని తళుకు బెళుకుల పటాటోపమే చివరివరకూ సాగుతుంది..ఈ మేలిముసుగుల్ని అధికారపార్టీ రాజకీయాలే రాయడం మీద మోజు వొదులుకుని అసలు రూపాన్ని చూడటంలో జర్నలిస్టులు విఫలమౌతున్న వాతావరణం విస్తరిస్తోంది. 

చంద్రబాబు వాస్తవాల్ని చూడలేకపోతే ఆపార్టీకి నష్టం, ఆయన ముఖ్యమంత్రిగా కూడా వున్నారు కాబట్టి ఇదే స్ధితి అదే పనిగా సాగితే ఆయనది చూపుమందగించిన  ప్రభుత్వమే అవుతుంది. 

మీడియా కూడా అంతగానే దివాళా తీస్తే చూపులేని దృతరాషు్ట్రడికి చెవుడు కూడా వచ్చినట్టవుతుంది. 



 

Create a free website or blog at WordPress.com.

Up ↑