Search

Full Story

All that around you

Category

శైలీధోరణులు

Trends and Life Style

రెండు రాషా్ట్రల సగటు మనిషిదీ ఒకటే హృదయం


రెండు రాషా్ట్రల సగటు మనిషిదీ ఒకటే హృదయం

(శనివారం నవీనమ్)
తన జీవితంలో ఎన్నో అంశాలను పరిశీలించి, పరిష్కరించానని, అయితే మనం దేశ,విదేశాల్లో ఎవరితో మిత్రుత్వం, శత్రుత్వం చేయాలో నిర్ణయించుకోవచ్చుగానీ, మన పక్కన వుండే వారిని నిర్ణయించుకోలేమని రాష్ట్రపతి ప్రణబ్ ముఖర్జీ అన్నారు. కాబట్టి ఇష్టం ఉన్నా లేకున్నా…కలిసి బ్రతకాల్సిందేనని, అందరూ కలిసి దేశాభివద్ధికి దోహదం చేయాల్సిందేనని అదే చరిత్ర చెప్పిన పాఠమని నిన్న హైదరాబాద్ లో ఓ పుస్తకావిష్కరణ సభలో ఆయన చేసిన వ్యాఖ్యానాలు చంద్రబాబునాయుడు, కెసిఆర్ ప్రభుత్వాలను ”చెంపలు వాయించుకుని గుంజీలు తీయాలని” పెద్దమనిషి ప్రేమతో మందలించినట్టుగా వున్నాయి. 
కెసిఆర్ ఆంధ్రానాయకుల్ని లత్కోర్లు, లఫంగీలు అని హేళన చేసినా…నన్ను టచ్ చేస్తే తెలంగాణా ప్రభుత్వానిక అదే ఆఖరురోజని చంద్రబాబు ఊగిపోయినా ఆంధ్రప్రదేశ్ లో గాని తెలంగాణా ప్రజలుగాని ఆవేశాలతో రెచ్చిపోలేదు. టిఆర్ఎస్, తెలుగుదేశం పార్టీలు వాటివాటి వైరాల్ని, గొడవల్ని ప్రజలకు పులిమే ప్రయత్నాలు చేస్తున్నా వాటిని అంటించుకోని రెండు రాషా్ట్రల ప్రజల సామరస్యం, వివేకం, ఇంగితం తెలుగురాషా్ట్రల్లో సగటు మనిషి కొండంత ఎత్తున నిలిపివుంచింది.ఇదే స్పూర్తిని రాష్ట్రపతి మాటల్లోకి మార్చారా అనిపిస్తోంది.
హైదరాబాదు తెలంగాణలో భాగంగా రాజధానిగా ఉన్నప్పటికీ ఆంధ్రప్రదేశ్‌ నూతన రాజధాని నిర్మాణం జరిగే లోగా పదేళ్లకు మించకుండా హైదరాబాదు నుంచే పాలన సాగించాలి గనక ఉత్పన్నమైన ప్రత్యేక నిబంధనల అధ్యాయమే సెక్షన్ 8 . రాజ్యాంగం ప్రకారం గవర్నర్‌ రాష్ట్ర ప్రభుత్వ సలహాల ప్రకారమే నడుచుకోవాలి. తెలంగాణ ప్రభుత్వానికీ అదే సూత్రం వర్తిస్తుంది. హైదరాబాద్లో ఆంధ్రప్రదేశా పరభుత్వం కూడా నివాసముంటోంది.దీనిపై మరో రాష్ట్ర ప్రభుత్వం అజమాయిషీ చేసే అవకాశముండదు. కనుక మధ్యంతర దశలో గవర్నర్‌కు కొన్ని ప్రత్యేక బాధ్యతలు అప్పగించడమే ఆ సెక్షన్‌ ఉద్దేశం. ఆ ప్రకారం గవర్నర్‌ …భవనాల కేటాయింపు…పౌరుల, ప్రధాన సంస్థల భద్రతకు సంబంధించి పర్యవేక్షణ చేయవలసి ఉంటుంది. ఇందుకోసం కేంద్రం ఆయనకు ఇద్దరు సలహాదార్లను నియమి స్తుంది. తెలంగాణ మంత్రివర్గంతో సంప్రదిస్తూ దాని సలహాల మేరకు గవర్నర్‌ పనిచేస్తారు. అయితే ఎప్పుడైనా ఆయన గనక ఆ ప్రభుత్వ నిర్ణయాలతో విభేదిస్తే అప్పుడు ఆయన విచక్షణాధికారమే అంతిమమవుతుంది.
ఈ సెక్షన్‌ ఇప్పటి వరకూ అమలు జరిగిందా, లేదా అంటే ఏదో మేరకు అమలు జరుగుతూనే ఉంది. భవనాల కేటాయింపు, వాహనాల కేటాయింపు వంటివి ఆయన ఆధ్వర్యంలోనే జరిగాయి. ఐఎఎస్‌, ఐపిఎస్‌ అధికారులే గాక మంత్రులూ, ముఖ్యమంత్రులూ కూడా ఆయనతో తరచూ సమావేశమవుతున్నారు. నాగార్జున సాగర్‌ డ్యాంపై పోలీసుల ఘర్షణ, ఎన్జీవోల కార్యాలయంలో ఘర్షణ వంటివి జరిగినప్పుడు ఆయన సంబంధిత అధికారులతో మాట్లాడారు. ముఖ్యమంత్రులతో నూ సంప్రదించారు. విద్యా సంబంధ మైన విషయాల పైనా ఇరు రాష్ట్రాల మంత్రులూ ఆయనతో సమావేశమై అవగాహనకు వచ్చారు. ఇవన్నీ స్థూలం గా సెక్షన్‌ 8 పరిధిలోవే.

కాకపోతే అమలు కాని అంశం ఒకటుంది. ఈ సెక్షన్‌ అమలుకు నిబంధనల పేరిట కేంద్రం ఒక లేఖ రాసింది. అందులో పోలీసు కమిషనర్ల నియామకం వంటివి కూడా గవర్నర్‌ సలహాల మేరకు జరగాలన్నట్టు పేర్కొంది. దానిపై తెలంగాణ అభ్యంతరం తెల్పడంతో పక్కన పెట్టారు. దాన్ని ఉపసంహరించాలని ఆ ప్రభుత్వం గాని అమలు చేయాలని ఎపి ప్రభుత్వం గాని ఎప్పుడూ గట్టిగా అడిగింది లేదు. ఇప్పుడు రాజకీయ ఇరకాటంలో చంద్రబాబు నాయుడు, ఆయన మంత్రులు దీన్ని పైకి తీశారు. తమ ప్రభుత్వాధినేతకే రక్షణ లేదు గనక స్వంత రాష్ట్ర పోలీసులను తెచ్చుకుంటామనీ, సరిగ్గా వారిపై ప్రతి వ్యూహ ప్రయోగం కోసం కెసిఆర్‌ ఆయన అనుయాయులు అసలా ఊసే ఒప్పుకోబోమని వాదించారు. 
చెప్పాలంటే ఇదంతా కృత్రిమమైన వ్యవహారం. పైగా ఈ క్రమంలో హైదరాబాదు శాంతిభద్రతలు పదే పదే చర్చకు రావడం రెండు రాష్ట్రాలకూ మంచిది కాదు. చంద్రబాబు నాయుడు ఢిల్లీలో సమర్పించిన ఒక పత్రంలో దాడులు జరుగుతున్నట్టు పేర్కొన్నారు. కొన్ని రకాలైన ఒత్తిళ్లు, అపార్థాలు ఉన్నా ప్రభుత్వ స్థాయిలో ఫిర్యాదు చేయాల్సినంత తీవ్ర పరిస్థితి హైదరాబాదులో లేదనేది వాస్తవం. 
ప్రధానంగా ఉద్యోగ కేంద్రాలలోనూ, అధికారుల బదలాయింపులోనూ, విద్యా సంస్థల పరీక్షలు, సీట్ల కేటాయింపులలోనూ, నీటి పంపిణీ లోనూ వివాదాలు వచ్చిన మాట, కొనసాగుతున్న మాట కాదనలేనిది. అయితే ఇందుకు బాధ్యత ప్రభుత్వాలది తప్ప ప్రజలది కాదు. వారి మధ్య ఘర్షణలు వచ్చిందీ లేదు. ఇంకా చెప్పాలంటే తెలంగాణ ప్రభుత్వం నిర్వహించిన పారిశ్రామికవేత్తల సదస్సుకు ఆంధ్రప్రదేశ్‌ హేమా హేమీలంతా వచ్చారు. అమరావతి నిర్మాణంలో భాగం కోసం తెలంగాణకు చెందిన సంస్థలూ ఉవ్విళ్లూరుతున్నాయి. ఎటొచ్చి తెలుగుదేశం, టిఆర్‌ఎస్‌ల రాజకీయ వైరమే పరిస్థితిని ఉద్రిక్తం చేసింది. 

గ్రేటర్‌ హైదరాబాదు ఎన్నికల కోణంలో ఉన్న టిఆర్‌ఎస్‌ కూడా అందుకు తగినట్టే స్పందించింది. సెక్షన్‌ 8ని గుర్తిస్తాము గాని దాన్ని అమలు చేయాల్సిన పరిస్థితులు లేవని తెలంగాణ సర్కారు అంటుంది. ఆ పరిస్థితులు ఉన్నాయా, లేదా అని నిర్ణయించు కోవలసింది గవర్నరే. ఇక ఎపి విషయానికి వస్తే ఈ సెక్షన్‌లో దాని ప్రస్తావనే లేదు. 
గవర్నర్‌ సంప్రదించాల్సింది తెలంగాణ సర్కారును తప్ప ఎపిని కాదు. కాకపోతే ఏమైనా ఫిర్యాదులు, విజ్ఞప్తులు ఉంటే స్వీకరించి నిర్ణయానికి వచ్చే అవకాశం ఉంటుంది.
అతి సామాన్య ప్రజలకు ఈ వివరాలన్నీ తెలిసి వుండకపోవచ్చు. అయితే ఏవివాదంలోనైనా, ఏ కీలకాంశంలోనైనా ప్రజల ప్రయోజనాలు ఎంత, పార్టీల లాభమెంత అని బేరీజువేసుకునే ఇంగితజ్ఞానం వున్న తెలుగు మనిషీ వర్ధిల్లు !

బిజెపి మీద అవినీతి మచ్చలు !(శనివారం నవీనమ్)


పదేళ్ల యుపిఎ హయాంలో కాంగ్రెస్‌ మంత్రులు, ముఖ్యమంత్రులు అవినీతిలో మునిగిపోగా, కాంగ్రెస్‌ అవినీతిని దుమ్మెత్తిపోసి అధికారంలోకొచ్చిన బిజెపి, ఏడాదిలోనే అవినీతి మచ్చల్ని వొదిలించుకోలేనంత గాఢంగా అంటించుకుంది. ఒక్కొక్కటిగా బయట పడుతున్న బిజెపి నేతల అవినీతి, అక్రమాలు ఆ పార్టీకి తల బొప్పి కట్టిస్తున్నాయి. అవినీతి ఆరోపణల్లో కూరుకుపోయిన సుష్మా స్వరాజ్‌, వసుంధరా రాజే, స్మృతీ ఇరానీ, పంకజ్‌ ముండే – ఈ నలుగురూ పార్టీలోని శక్తివంతమైన మహిళలే! 

సుష్మా స్వరాజ్‌, వసుంధరా రాజే, పంకజా ముండే అక్రమాలతో బిజెపి నాయకులు, ప్రధాని నరేంద్ర మోడీలకు మొహంచూపించలేని అవస్ధ. ఈ ఉదంతాలకు స్మృతి ఇరానీ విద్యార్హతల వివాదం తోడై ఊపిరాడని దుస్ధితి. ఆత్మరక్షణలో పడ్డ ప్రధాని, బిజెపి అగ్ర నేతలు ఆరోపణలెదుర్కొంటున్న వారందరినీ సమర్థించడమే పనిగా పెట్టుకున్నారు. నిందితులను వెనకేసు కొచ్చేందుకు ఏ మాత్రం జంకూ గొంకూ ప్రదర్శించట్లేదు. నీతులు ఎదుటి వారికి తప్ప తమకు కాదన్నట్లు ఆ పార్టీ వ్యవహరించడం దారుణం. 
ఎవరిని ఏమంటే ఎవరి మెడకు ఏం చుట్టుకుంటుందోనన్న భయం బిజెపి నేతలను వెంటాడుతున్నట్లుంది. అందుకే ఆరోపణలెదుర్కొంటున్న వారిపై ఈగ వాలనీయడం లేదు. ఎన్నికల్లో బిజెపి నినాదం కుంభకోణాల కాంగ్రెస్‌ను గద్దె దించడం. అవినీతి రహిత పాలన అందించడం. మోడీ ప్రభుత్వం, సంవత్సరంలోనే ఆ హామీ నుంచి పూర్తిగా వైదొలిగింది. అవినీతి విషయంలో తమది యుపిఎ కాదని ప్రధాని చెప్పుకుంటున్నారు. 
యుపిఎ ప్రభుత్వంలో భారీ బొగ్గు స్కాంను కోల్‌గేట్‌ అన్నారు. అనంతరం రైల్వే గేట్‌ ముందుకొచ్చింది. ఎన్‌డిఎ సర్కారులో లలిత్‌ గేట్‌ బిజెపిని, కేంద్ర ప్రభుత్వాన్ని కుదిపేస్తోంది. లలిత్‌ గేట్‌లో తొలుత విదేశాంగ శాఖ మంత్రి సుష్మా స్వరాజ్‌ పేరు వెల్లడైంది. ఐపిఎల్‌ మాజీ అధిపతి, ఆర్థిక నేరగాడు లలిత్‌ మోడీకి బ్రిటన్‌ నుంచి పోర్చుగల్‌ వెళ్లేందుకు సుష్మా మంత్రి హోదాలో వీసాకు సిఫారసు చేసిన ఉదంతంపై బ్రిటిష్‌ మీడియా భారత్ పరువు తీసింది. కేవలం మానవతా దృక్పథంతోనే వీసాకు సాయం చేశానని సుష్మా చెప్పిన అబద్ధం అతకలేదు. లలిత్‌ మోడీ విదేశీ మారకద్రవ్య నియంత్రణ చట్టం (ఫెమా) నిబంధనలను ఉల్లంఘించారు. ఎన్‌ఫోర్స్‌మెంట్‌ డైరెక్టరేట్‌ (ఇడి) లలిత్‌ అక్రమాలపై దర్యాప్తు చేస్తోంది. ఐపిఎల్‌ బెట్టింగ్‌లు, ఆర్థిక లావాదేవీలు, కుంభకోణాలకు పాల్పడి దేశం విడిచి లండన్‌కు పారిపోయిన వైట్‌ కాలర్‌ క్రిమినల్‌ లలిత్‌ మోడీ. అతగాడిపై రెడ్‌, బ్లూ కార్నర్‌ నోటీసులు జారీ అయ్యాయి. అలాంటి నేరస్తుడికి కేంద్ర మంత్రి హోదాలో ఉన్న వ్యక్తి మన దేశానికి రప్పించి, అక్రమాలపై విచారణకు ఆదేశించాల్సింది పోయి దేశాలు తిరగడానికి వీసా ఇప్పించడమేంటి? సుష్మా కుటుంబానికి, లలిత్‌ మోడీకి సంబంధాలున్నాయి. లలిత్‌ తరఫున కోర్టుల్లో సుష్మా భర్త, కూతురు వాదిస్తున్నారు. సుష్మా క్విడ్‌ప్రోకో నిరూపణకు ఈ ఆధారాలు సరిపోతాయి. అయినా నరేంద్ర మోడీ సర్కారు, బిజెపి సుష్మాను వెనకేసుకొచ్చాయి. 
రాజస్థాన్‌ ముఖ్యమంత్రి వసుంధరా రాజే సైతం లలిత్‌ మోడీ వీసాకు సహకరించి అడ్డంగా దొరికిపోయారు. ప్రతిపక్ష నాయకురాలిగా ఉండి బ్రిటన్‌ ఇమ్మిగ్రేషన్‌కు స్టేట్‌మెంట్‌ ఇచ్చారు. పైగా తాను సిఫారసు చేసినట్లు భారత అధికారులకు తెలపొద్దని షరతు పెట్టారు. ఆ పత్రం బయటపడ్డాక కూడా వసుంధరా రాజీనామా చేయాల్సిన అవసరమే లేదని బిజెపి వత్తాసు పలకడం ఆమె అక్రమాలను సమర్థించడమే అవుతుంది. లలిత్‌ మోడీ అక్రమంగా ఎదిగిపోడానిక వసుంధరా రాజేనే కారణం. ఆమె ముఖ్యమంత్రిగా అందించిన సహకారంతోనే రాజస్థాన్‌ క్రికెట్‌ అసోసియేషన్‌ ఏర్పాటు చేసి బిసిసిఐ, ఐపిఎల్‌ స్థాయికి అంచెలంచెలుగా ఎదిగాడు. అందుకు ‘ఉడతా భక్తి’తో వసుంధర తనయుడు, బిజెపి ఎంపి అయిన దుష్యంత్‌ కంపెనీలో పది రూపాయల ముఖ విలువ చేసే షేర్‌ను రూ.96 వేల చొప్పున 815 షేర్లు కొనుగోలు చేశారు. లలిత్‌ మోడీకి, వసుంధర కుటుంబాలకు మధ్య సంబంధాలకు ఇంతకంటే ఏ సాక్ష్యాలు కావాలి? వ్యాపార వృద్ధిని ఆశించి అత్యధిక ధరకు లలిత్‌ షేర్లు కొన్నారని బిజెపి వాదించడం ఘోరం. 
మహారాష్ట్రలో బిజెపి మంత్రి పంకజా ముండే అవినీతి మరీ క్షమించరానిది. అంగన్‌వాడీ కేంద్రాల్లో పేద పిల్లలకు అందించే వేరుశనగ పప్పుండలు, దుప్పట్లు, చాపల కొనుగోలులో రూ.200 కోట్లకు పైగా మెక్కారు. ఒకే రోజు టెండర్లు లేకుండా వందలాది ప్రభుత్వ తీర్మానాలతో వస్తువులు కొన్నారు. మంత్రి పంకజాపై ఎసిబి వద్ద కేసు నమోదు కాగా, ఆ రాష్ట్ర ముఖ్యమంత్రిదీ సమర్థన పల్లవే. 
ఇక కేంద్ర మంత్రి స్మృతి ఇరానీది మరో వివాదం. ఎన్నికల కమిషన్‌కు అందజేసిన అఫిడవిట్‌లో విద్యార్హతలపై తప్పుడు సమాచారం ఇచ్చారంటూ దాఖలైన పిటిషన్‌ను ఢిల్లీ మెట్రోపాలిటన్‌ కోర్టు విచారణకు స్వీకరించింది. ప్రజా ప్రాతినిధ్య చట్టం ప్రకారం తప్పుడు అఫిడవిట్‌ ఇచ్చిన వ్యక్తి పదవిలో కొనసాగడానికి వీల్లేదు. లలిత్‌ గేట్‌లో కేంద్ర మంత్రి, ముఖ్యమంత్రి, ఎంపి ఇరుక్కున్నా, మహారాష్ట్ర మంత్రి భారీ స్కాంకు పాల్పడ్డా, మరో కేంద్ర మంత్రి స్మృతిపై తప్పుడు అఫిడవిట్‌ కేసు కోర్టులో విచారిస్తున్నా ప్రధాని నరేంద్ర మోడీ మౌనం దాల్చడం గర్హనీయం. 
కుంభకోణాలు, ఆశ్రిత పక్షపాతానికి పాల్పడ్డ వారిని పదవుల నుంచి తొలగించి సమగ్ర విచారణ జరిపించినప్పుడే అవినీతి రహిత పాలన హామీకి కొంతైనా విలువ ఉంటుంది. ఆరోపణలెదుర్కొంటున్నవారిని పదవుల్లో కొనసాగించడం అనైతికం అనిపించుకుంటుంది.
ఇలావుండగా నరేంద్ర మోడీ ప్రభుత్వ నిరంకుశ పోకడలపై ప్రతిపక్షాల నుంచే కాదు, సొంత పార్టీ నుంచే వ్యతిరేకత వ్యక్తమవుతోంది. రామ్‌ జెత్మలాని, అరుణ్‌శౌరీ నేడు కీర్తీ ఆజాద్‌, శత్రుఘ్న సిన్హా, యశ్వంత్‌ సిన్హా, ఎంపి ఆర్‌కె సింగ్‌ ఇలా ఒక్కొక్కరు ధిక్కార స్వరాలు వినిపిస్తున్నారు. బిజెపిలో మోడీ-షాలు అన్నీ,అంతా తామే అన్నట్లుగా వ్యవహరించింది. వీరిధోరణి మీద ద్వితీయ శ్రేణి నాయకత్వం గుర్రుగా వుంది. రాంజెత్మలానీ, అరుణ్‌శౌరీ వీరికి మొదట దారి చూపారు. లలిత్‌గేట్‌ వ్యవహారం బయటపడ్డాక యశ్వంత్‌ సిన్హ, ఆర్‌కె సింగ్‌ లాంటివారు తిరుగుబాటు స్వరాలను వినిపించడం మొదలెట్టారు పార్టీలోని నలుగురు శక్తివంతమైన మహిళలు -సుష్మా స్వరాజ్‌, వసుంధరా రాజే, స్మృతీ ఇరానీ, పంకజ్‌ ముండే- లు అవినీతి ఆరోపణల్లో కూరుకుపోవడంతో వారిని దీనినుంచి ఎలాగైనా కాపాడాలనే ఉద్దేశంతో మోడీ ప్రభుత్వం, బిజెపి ప్రయత్నాలు ముమ్మరం చేసిన తరుణంలో పార్టీలో కొందరు ఈ తిరుగుబాటు స్వరాలు వినిపించనారంభించారు. 
2014 మే 26న ప్రభుత్వం ప్రమాణస్వీకారం చేసినప్పటి నుంచి 75 ఏళ్లు దాటిన వారందరూ బ్రెయిన్‌ డెడ్‌ కింద మారిపోయారని యశ్మంత్‌ సిన్హా వ్యంగ్యంగా విమర్శించారు. ఇక కీర్తీ ఆజాద్‌ డిడిసిఏలో అక్రమాలు జరిగాయని ఆర్థిక మంత్రి అరుణ్‌ జైట్లీపై ప్రత్యక్షంగానే దాడి చేశారు. డిడిసిఏకి జైట్లీనే అధిపతి. తమ పరిధులను దాటి ప్రవర్తిస్తే సహించేది లేదని పార్టీ సభ్యులకు మోడీ-షా నాయకత్వం హెచ్చరించినా, అసమ్మతి స్వరాలు ఊపందుకోవడం గమనార్హం. ప్రభుత్వం, పార్టీ బలహీనపడ్డాక ఈ అసమ్మతి సెగ మరింతగా విస్తరించే అవకాశముంది. 

 

జీవనశూన్యంలో నైతికతను వొంపే తీర్ధయాత్ర! 


మూఢభక్తితోకానీ, చేసినతప్పులన్నీ రద్దయిపోతాయన్న అత్యాశ వల్లగానీ, ఓ సారి చూసివద్దాం అన్న కుతూహలం వల్లగానీ, అవవాటుగా పెరుగుతున్న యాత్రావినోదంగాకానీ, ప్రజల్లో ఆలయాల సందర్శన పెరుగుతూవుంది. ఇవాళ అన్నవరంలో సత్యనారాయణ స్వామి ఆలయ సందర్శన తో సహా కొంతకాలంగా కుటుంబసమేతంగా నేను చేస్తున్న తీర్ధయాత్రల్లో చాలా విషయాలు గ్రహిస్తున్నాను.

జీవితాన్ని ఆక్రమించుకుంటున్న శూన్యాన్ని పుణ్యక్షేతా్రలు, తీర్ధయాత్రలూ నింపుతున్నట్టున్నాయి. దర్శనాలు, పూజా క్రతువుల ద్వారా ఒక నిబద్ధతను, ధార్మిక ప్రసంగాల వల్ల ఒక ప్రాతిపదికను, ఆధ్యాత్మిక భావాల వల్ల తాపత్రయాలు వీలైనంత వొదిలించుకోవాలన్న తాత్వికతనూ, ఎంతోకొంత ప్రజలు నింపుకుంటున్నారు. నిజానికి ఇవన్నీ ఎంతో కొంత భారతీయ సమాజపు భావజాలంలోనే వున్నాయి. 
తరం నుంచి మరో తరానికి ఈ భావాలను రీఇన్ ఫోర్స్ చేసుకోవడమే తీర్ధయాత్రల రద్దీ పెరగడానికి మూలం. గ్రామాల్లో ఆలయాలు ప్రత్యక్షంగా సంఘజీవనాన్ని పటిష్టం చేయడంతోపాటు ఊరి ఆరోగ్య సంరక్షణకు ప్రాధమిక కేంద్రాలుగా కూడా వుండేవి. ఇపుడు గ్రామాలు అంతరించిపోతున్నాయి. సమాచార, రవాణా వసతులు పెరిగే గ్లోబల్ వాతావరణం కళ్ళముందుకి వచ్చేసింది. చిన్నా చితకా అంతరించిపోయి మెగావే మిగలడం గ్లోబల్ లక్షణమే. ఆప్రకారమే సింహాచలం, అన్నవరం, విజయవాడ, శ్రీశైలం, తిరుమల లాంటి ”పెద్ద” ఆలయాలు చేసుకున్న పుణ్యం అంతా ఇంతాకాదు. బస్సులు, కార్లు, రైళ్ళు, విమానాలకు ప్రజల్ని ఈ ప్రాంతాలకు చేర్చడం మీదుండే ఇంటె్రస్టు అంతా ఇంతాకాదు. 
ఏమైతేనేమి పూజాక్రతువులనుంచి, ధార్మిక ఆలోచనలనుంచి, ఆధ్యాత్మిక చింతనల నుంచీ ప్రజలు భక్తి భావాలకంటే జీవితాల్లో నైతికతను నింపుకుంటున్నారనీ, నైతిక బలాన్ని సుసంపన్నం చేసుకుంటున్నారనీ అర్ధమౌతోంది. ప్రపంచాన్ని పరిచయం చేసుకోడానికి క్షణక్షణం అవకాశమున్న కమ్యూనికేషన్ యుగంలో మనుషుల అవగాహనలకు హేతుబద్దతే ప్రాతిపదిక కావడంలో ఆశ్చర్యం లేదు. ఆర్జిత సేవల విషయంలో సిబ్బందినీ అర్చకుల్నీ ప్రశ్నించే లక్షణం బాగా పెరిగింది. చెల్లించిన సేవలపై నిలదీయడనికి అది వారికి డబ్బు ఇచ్చిన ధీమా! 
ఎన్ని అసౌకర్యాలనైనా ఓర్చుకుని సహించే దిగువమధ్య తరగతివారు సర్వదర్శనం క్యూలలో అవసరమైతే ఎవరినైనా నిలదీయడానికి సంకొచించని నిర్మొహమాట స్వభావం ”ప్రశ్నించే” అలవాటు పెరుగుతోందనడానికి ఒక సంకేతం. బ్యాలెట్ బాక్సుల్లో ఈ ”ప్రశ్నలే” ఫలితాల అంచనాలను తారుమారు చేసేవని అర్ధంచేసుకోవచ్చు. 
ఆలయాలకు సకుటుంబాలుగా వచ్చే యాత్రికుల్లో చాలా సందర్భాల్లో టూర్ మేనేజర్లు ఆ ఇంటి గృహిణులు కూతుర్లు కోడళ్ళే. ఇది స్త్రీ స్వాభావికమైన మేనేజీరియల్ స్కిల్లే. 
ఇవన్నీ పక్కనపెట్టేయండి…రాశులుపోసినట్టు వుండే మనుషుల జీవన సౌందర్యం తీర్ధయాత్రల్లో తప్ప, ఆలయ సందర్శనల్లోతప్ప ఇంకెక్్కడ కనబడుతుంది? అసలు మనుషుల్ని మించిన దేవతలూ, దేవుళ్ళూ ఇంకెవరున్నారు? అందుకే దీన్నొక బ్రాండుగా, ఐకాన్ గా ”ముక్కోటి దేవతలు”అన్నారు.

రియల్ ఎస్టేటూ – వడగాలీ 


రియల్ ఎస్టేటు వ్యాపారమే ప్రధాన ఆర్ధిక కలాపమైపోవడమంటే నేలవేడిపెంచి మనుషుల్ని చంపెయ్యడమే! ఇపుడు జరుగుతున్నది అదే!! భూమిని కొని ప్లాటులుగా మార్చి అమ్మేవారు అందులో పచ్చదనపు నిష్పత్తిని పాటించకపోతే కనీసం ఏడుసంవత్సరాల జైలుశిక్ష వేసేలా కఠిన చట్టాలు తెచ్చి అమలు చేస్తేనే భావితరాల వారని వడగాలి మరణాలనుంచి తప్పించవచ్చు.

భారత దేశాన్ని, అందునా దక్షిణ భారతాన్ని, అందులోనూ తెలుగు రాష్ట్రాలైన ఆంధ్ర ప్రదేశ్, తెలంగాణ రాష్ట్రాలను వేడి గాలులు పట్టి ఊపేస్తున్నాయి. గత వారం రోజుల్లోనే వెయ్యికి పైగా ప్రజలు వడగాలులకు బలైపోగా మొత్తం మీద ఈ వేసవి కాలంలో వడదెబ్బకు గురై మరణించినవారి సంఖ్య 1100 దాటి పోయిందని జాతీయ, అంతర్జాతీయ పత్రికలు తెలిపాయి. దాదాపు ప్రతి అంతర్జాతీయ వార్తా సంస్ధ భారత దేశంలో వేడి గాలుల గురించి గత కొద్ది రోజులుగా తప్పనిసరిగా వార్తలు ప్రచురిస్తున్నాయంటే దేశంలో ఎండల తీవ్రతను అంచనా వేయవచ్చు.
వాతావరణంలో వస్తున్న పెను మార్పుల మరో రూపమే ఈ సంవత్సరం దేశ వ్యాప్తంగా ఎదుర్కొంటున్న వడగాల్పులు అని సెంటర్‌ ఫర్‌ సైన్స్ అండ్‌ ఎన్విరాన్మెంట్‌ (సి యస్‌ ఇ)గుర్తించింది. ఈ సంవత్సరం దేశ వ్యాప్తంగా మృతి చెందిన వారిలో 60 శాతం మంది తెలుగు రాషా్టల్రల్లోనే వుండటం ఆందోళననీ, ఆశ్చర్యాన్నీకలిగిస్తున్నది.  
గత మూడు దశాబ్దాల సగటు కన్నా ఐదు డిగ్రీలకు మించిన ఉష్ణోగ్రత వుంటే ఆ రోజును వడగాల్పు రోజుగా ప్రకటించ వచ్చని సి యస్‌ ఇ వివరించింది.

వేడి గాలులకు గురై మరణించినవారందరూ పేదలే. ప్రకృతి ప్రకోపాన్ని తట్టుకుని బతకాలంటే వివిధ సౌకర్యాలు అందుబాటులో ఉంటే తప్ప సాధ్యం కాదు. ఎ.సిలు, వాటర్ కూలర్లు ఇప్పుడు సామాన్యుడికి అందుబాటులో ఉండేవి కాదు. శక్తివంతమైన ఎ.సి మిషన్లు కూడా తీవ్ర వేడి వాతావరణం మధ్య గదుల్ని చల్లగా ఉంచడంలో విఫలం అవుతున్నాయి. వాటర్ కూలర్లు తిరిగి వేడి గాలినే వినియోగదారుల మీదికి మళ్లిస్తున్న పరిస్ధితి. పైగా వాటర్ కూలర్లు తగిన ఫలితం ఇవ్వాలంటే కాస్త విశాలమైన చోటు ఉండవలసిందే. 
నివాసానికి వీలయిన చోట్లన్నీ రియల్ ఎస్టేట్ వ్యాపారుల లాభ దాహం రీత్యా అందనంత ఎత్తుకు చేరడంతో కొద్ది చోటులోనే చిన్న చిన్న ఇళ్ళు పక్కపక్కనే, ఇరుకుగా కట్టుకోవాల్సిన పరిస్ధితి నెలకొని ఉంది. ఇలాంటి క్రిక్కిరిసిన చోటుల్లో వాటర్ కూలర్లు పనిచేయకపోగా మరింత ఉడుకు వాతావరణాన్ని సృష్టిస్తాయి, వాటర్ కూలర్ లేకపోతేనే నయం అనుకునేంతగా! ఈ పరిస్ధితుల్లో ఆదాయంలో అత్యధిక భాగం తిండికి, నివాసానికి, రోగాలకు ఖర్చైపోగా ఎ.సి మిషన్లు కొనుక్కోగల స్తోమత పేదవారికి లభించే అవకాశమే లేదు. 
అందువల్ల మృతుల్లో అత్యధికులు నడి ఎండల్లో సైతం పని చేయక తప్పని పరిస్ధితిని ఎదుర్కొనే నిర్మాణ కార్మికులు, ఇళ్ళు లేక నీటి తూముల్లో, చెట్ల కింద, పేవ్ మెంట్ల పైన నివసించే కడు పేదలే ఎక్కువగా ఉన్నారని ప్రభుత్వ లెక్కల్లో తెలుస్తున్న చేదు వాస్తవం. పేద వర్గాలలో కూడా చిన్న పిల్లలు, వయసు పైబడిన వాళ్ళు, కొన్నిచోట్ల స్త్రీలు ఎక్కువగా ఎండవాత పడి మరణిస్తున్నారు. పల్లెల్లో వ్యవసాయ కూలీల మరణాలు అసలు లెక్కలోకే రాని పరిస్ధితి! ప్రకృతి ప్రకోపానికి కూడా వర్గ దృష్టి ఉన్నదని దేశంలో సంభవిస్తున్న వేడి గాలుల స్పష్టం చేస్తున్నాయి.

ముఖ్యంగా నగర ప్రాంతాలల్లో చెట్ల సంఖ్య తగ్గిపోవడం, కాంక్రేట్‌ భవనాలు పెరిగి పోవడం తో ఇటు వంటి పరిస్థితులు ఏర్పడుతున్నాయి.ఈ ప్రభావంతో వాస్తవ ఉష్ణోగ్రత కన్నా 3 నుండి 4 డిగ్రీలు అదనంగా ఉన్నట్లు భావిస్తామని సి యస్‌ ఇ వాతావరణ మార్పు కార్యక్రమ మేనేజర్‌ అర్జున శ్రీనిధి తెలిపారు. 2010లో కన్నా ఈ సంవత్సరం వడగాల్పుల కాలం చాల తక్కువగా ఉన్నదని, అయినా మృతుల సంఖ్య చాల ఎక్కువగా ఉన్నదని ఆయన గుర్తు చేసారు. ఫిబ్రవరి, మార్చ్ లలో వాతావరణం తడిగా ఉంది, అకస్మాత్తుగా మార్పు రావడం వల్లనే ఈ విధంగా జరిగినదని ఆయన పేర్కొన్నారు.మానవ ప్రేరేపిత ప్రపంచ ఉష్ణోగ్రత 2014 సంవత్సరాన్ని అత్యధిగా వేడి ఉన్న సంవత్సరంగా మార్చిందన్నారు.
అందుకనే దీనిని అత్యంత వేడి దశాబ్దంగా పేర్కొనవచ్చు. గత పదేళ్ళలో ప్రపంచ ఉష్ణోగ్రత సగటున 8 డిగ్రీలు పెరగడంతో మరింత తీవ్రంగా పెరిగే అవకాశం ఉంటుందని సి యస్‌ ఇ పరిశోధకులు హెచ్చరించారు. రాతప్రూట ఉష్ణోగ్రతలు సహితం పెరుగుతున్నాయని అన్నారు. ఇటీవల ఢిల్లీ, అహ్మదాబాద్‌ లలో రాత్రిపూట 39 డిగ్రీల ఉష్ణోగ్రత ఉండడం గమనార్హం. ప్రతి సంవత్సరం వడగాల్పుల రోజులు 5 నుండి 30 నుండి 40 వరకు పెరిగే అవకాశం ఉన్నాదని వీరు హెచ్చరించారు. ఇటువంటి ఉపద్రవాలు జరిగినప్పుడు మృతుల కుటుంబాలకు కొంత ఆర్ధిక సహాయం ప్రకటించి ప్రభుత్వాలు తమ బాధ్యతలను సరిపుచ్చు కోవడం పరిపాటి అవుతున్నది. తక్షణం అవసరమైన వైద్య సదుపాయాలు కల్పించడం, ప్రత్యెక వైద్య బృందాలను ఏర్పాటు చేసి మారుమూల ప్రాంతాలల్లో ప్రజలకు అందుబాటులో ఉండేటట్లు చూడాలి.
ఇటువంటి ఉష్ణోగ్రతలను తట్టుకొనే విధంగా ప్రజానీకం ఎటువంటి ముందు జాగ్రతలు తీసుకోవాలో విస్తృతంగా ప్రచారం చేయవలసి ఉంది. పగటి పుట ఇండ్లల్లో నుండి బైటకు రావద్దని హెచ్చరించి జిల్లా అధికారులు తమ బాధ్యతలు తీరాయని అనుకొంటే సరిపోదు. పనుల కోసం, ఉపాధి కోసం బైటకు రాక తప్పదు. 

పెద్ద ఎత్తున మజ్జిగ సరఫరా కేంద్రాలు ఏర్పాటు చేయడం చేయవచ్చు. ఈ విషయమై ఈ సంవత్సరం ఎవ్వరూ పెద్దగా ఆసక్తి కనబరచిన్నట్లు లేదు. హైదరాబాద్‌ నగరంలో హోం గార్‌‌డ లకు పగటి పుట డ్యూటీలు వేయకుండా నిర్ణయం తీసుకోవడం హర్షణీయం. 
తాత్కాకాలిక చర్యలతో పాటు దీర్ఘకాలిక ప్రభావం చూపే చర్యల పట్ల దృష్టి సారించాలి. నగరాల్లో తగ్గుతున్న గ్రీనరి పట్ల దృష్టి సారించాలి. పెద్ద ఎత్తున మొక్కలు నాటే ప్రయత్నం చేయాలి.
ప్రతి సంవత్సరం వేసవి అనంతరం వర్షాలు పడగానే లక్షల సంఖ్యలో మొక్కలు నాటుతున్నామని వనమోహత్సవాలు జరుపుతున్నా ప్రభావం కనబడటం లేదు. నాటిన మొక్కల గతి గురించి ఎప్పుడైనా ఆడిట్‌ నిర్వహించారా ? వాటి గతి ఎమవుతున్నదో ఎప్పుడైనా సమీక్ష జరిపారా ?
వాతావరణ మార్పుకు అనువుగా భవనాల డిజైన్‌ మార్చడం, ప్రజల్లో అవగాహన కలిగించి తట్టుకొనే విధంగా సమాయత్త పరచడం కోసం ఈ సందర్భంగా ప్రభుత్వాలు దీర్ఘకాలిక ప్రణాలికలను రూపొందించు కోవాలి. పట్టణ ప్రణాళిక విభాగంలోనే పర్యవణ విభాగం సైతం ఏర్పాటు చేసి, అందుకు విశేష ప్రాధాన్యత ఇవ్వాలి. 

సిగ్గూ ఇంగితం మరచిన ఓ కీర్తి కండూతి కాంగ్రెస్ పుర్రెల దండతో  కెనడాలో ఊరేగింది 


సిగ్గూ ఇంగితం మరచిన ఓ కీర్తి కండూతి కాంగ్రెస్ పుర్రెల దండతో  కెనడాలో ఊరేగింది

పర్యావసానమెరుగని జ్ఞానం వల్ల బుద్ధి కించపడింది 

చిరుమోతాదువిషంలాగ అహంకారం తలకెక్కిన కొద్దీ వ్యక్తిత్వం మృతకణమైపోతుంది.

వారు దేశాన్ని చెత్త చెత్త చేసి వెళ్ళిపోయారుఅని కెనడా-టోరంటో సభలో ప్రధాని మోదీ కాంగ్రెస్ ని యుపిఎ ప్రభుత్వాన్ని విమర్శించడం ఏ విధంగానూ సమర్ధనీయమనిపించడంలేదు. పాలకులు మారినా నిరంతరాయంగా కోనసాగే ప్రభుత్వ వ్యవస్ధలో రాజకీయ ప్రత్యర్ధులను పరదేశంలో, ఆదేశాధినేతల సమక్షంలో చులకన చేయడం భారతదేశాన్ని అవమానించడమే.

మోదీ అంతటి మనిషికి ఇది తెలియదని అనుకోలేము. తనను తాను కొత్తగా ప్రతిష్టించడానికి ఉద్దేశ్యపూర్వకంగానే పరాయి నేలమీద సాంప్రదాయిక గౌరవ మర్యాదలను పెకలించి వేశారనుకోవాలి. కీర్తి కండూతి తలకెక్కి దిగిరావడంలేదనుకోవాలి. పరనిందకు ఆత్మస్తుతికి హద్దులు చెరిగిపోయాయనిపిస్తూంది. మోదీ కాంగ్రెస్ కంటే గొప్ప వారు కావచ్చు, బిజిపికంటే చాలా గొప్పవారు కావచ్చు. కానీ దేశం కంటే గొప్పవారు కానేకారు. 

(120 కోట్లమంది వున్న పాలనా వ్యవస్ధకు అధినేత అయిన భారత ప్రధాని శైలి మీద వ్యాఖ్యానించే అర్హతా యోగ్యతా నాకు నిస్సందేహంగా లేవు. చాలా ఆలోచించి ఉండబట్టలేక కొంత అయిష్టతతోనే నేను సైతం సహేతుకమైన ఈ నాలుగు రాళ్ళూ వేస్తున్నాను) 


Iఫోనేగా ఇవ్వనివ్వండి …పోయేదేమీలేదు 


మన పిల్లలు మారాంచేస్తే, మనకి మోజు పుడితే వేల రూపాయల స్మార్ట్ ఫోన్లు కొంటున్నాము. మనం ఎన్నుకున్న వారి సదుపాయం కోసం యాభై మూడు వేల చొప్పున ఖర్చుపెటి్ట  iPhone 6 కానుక ఇవ్వలేని దరిద్రగొట్టు స్ధితిలో ఆంధ్రప్రదేశ్ లేదు. 

అన్నీ ఫీచర్లూ వాడుకోగలిగితే స్మార్ట్ ఫోనంటే చేతిలో ఆఫీసే కాదు సమాచారలోకమే వున్నట్టు. ఆ ప్రయోజనాలతో పోల్చినపుడు స్మార్ట్ ఫోన్ల ఖరీదు అసలు ఖర్చేకాదు. టెక్నాలజీని వినియోగించుకునే ఎన్విరాన్ మెంటు తీసుకు రావడానికి గతంలో చంద్రబాబు ప్రయత్నం చేశారు. మనకు తెలియదు, ఎవరు చెప్పినా వినం కాబట్టి ఆయన్ని హైటెక్ బాబు అని వెటకరించి మూలన పడేశాం. 

దేశప్రజల సగటు వయసు 27 ఏళ్ళు..అంటే ఇది యువతీ యువకుల దేశం. అసలు స్మార్ట్ ఫోన్ అవసరమా కాదా అని పదిమంది యువతీ యువకుల్ని అడగండి. హెచ్చు మంది వద్దంటే ఈ చర్చే లేదు.

స్మార్ట్ ఫోన్లన్లన్నిటిలోకీ iPhone నాణ్యమైనదీ సురక్షితమైనదీ…ఎమ్మెల్యేలకు ఇప్పటికే iPad లు ఇచ్చి వున్నారు కాబట్టి iPhone కూడా జతైతే రెండిటి మధ్యా సమాచారమార్పిడి సుళువుగా వుంటుంది. ఫీచర్లువాడుకోవడం ఇప్పటికిప్పుడే రాకపోయినా క్రమంగా అన్నీ తెలుస్తాయి. అతవరకూ మన ఎమ్మెల్యేకి iPhone ఓ స్టేటస్ సింబల్ గా అయినా వుంటుంది…వుండనివ్వండి

ఇంకో పదివేలు ఎక్కువైతే అవుతుందికాని iPhone 6 కంటే బేటరీ హెచ్చు సమయం వచ్చే iPhone 6 Plus ఇవ్వడమే బెటర్ అని నా రికమెండేషన్ 

మహా అయితే కోటి రూపాయల ఖర్చయ్యే కానుక మీద పొద్దున్న టివిలో చర్చ చూస్తే అందులో పాల్గన్న వారూ యాంకర్లూ రిటైరైపోవడమే బెటర్ అనిపించింది. విషయం తెలియకపోవడం తప్పుకాదు. తెలుసుకోకుండా నోటికొచ్చింది లక్షలాది మంది ముందు మాట్లాడమే నేరం.

iPhone తో రాష్ట్రం దివాళాతీయదు…కానీ, టెక్నాలజీని వినియోగించుకోవడమంటే మనల్ని మనం అప్ గ్రేడ్ చేసుకోవడం కూడా అని గ్రహించకపోతే, దాని మీద మనం దుమ్మెత్తి పోస్తూ వుంటే కొయ్యగుర్రం మీద స్వారీ చేస్తూ మనమే ముందున్నామని భ్రమించడమే! 

ఆమె వేట ఘనంగా సాగింది 


ఆమె వేట ఘనంగా సాగింది 
ఆమె తీవ్రంగా గాయపరచింది ‘ఒక ఆడది నోరెత్తకూడదన్న’ ఒక ఆధిపత్య ధోరణిని 

(శాసన సభలో నిన్న రోజా ప్రవర్తన తీరు అభ్యంతరకరమని టివిలు చూసిన వారు బాధపడుతున్నారు. వెటకరిస్తున్నారు. తీర్పులిస్తున్నారు. పాక్షిక ప్రత్యక్ష ప్రసారాల్లో ఆమె ఎక్స్ ప్రెషన్లు మాత్రమే కనబడ్డాయి. రోజూ రోజా పట్ల మాటరాకుండా అదేమిటో అర్ధమయ్యే విధంగా పెదవులు కదుపుతూ, బాడీ లాంగ్వేజితో పురుష ప్రతినిధులు కొందరు ఎంత అసభ్యంగా వ్యవహరిస్తున్నారో ప్రసారాలకు అందవని అసెంబ్లీ బీటులో వున్న పాత్రికేయ మిత్రులు చెబుతున్నారు. యాక్టివ్ గా ఎక్స్ ప్రెసివ్ గా వుండే ఏ మహిళ పట్ల అయినా కూడా ఇలాంటి ప్రవర్తనే వుంటుందంటున్నారు. 

ఇది వైరి పక్షాన్ని సహించలేని రాజకీయంకాదు…
సీ్త్ర తల ఎత్తకూడదన్న మగ అహంకారం
నేను ఇపుడు రోజా ఫాన్ ని)

ప్రజల జీవనం సజావుగా ప్రశాంతంగా వుండటానికి కుటుంబ సంబంధాల్లో, సాంఘిక సంబంధాల్లో, ఆర్ధిక సంబంధాల్లో, రాజకీయ సంబంధాల్లో సమతూకం ముఖ్యం. ప్రభుత్వాలు పరోక్షంగా, ప్రత్యక్షంగా ఈ సంబంధాలన్నిటినీ ప్రభావితం చేస్తున్నాయి. ఇంకొక వైపు వైజ్ఞానిక, శాసీ్త్రయ అంశాల్లో వికాసం అనూహ్యంగా, మెరుపువేగంతో వుంది. వీటన్నిటితో పాటు, వీటన్నిటికీ మించి ఎప్పటికప్పుడు సాంక్కృతిక పునర్జీవం జరగకపోతే అన్ని రంగాలు, ఆయా రంగాల్లో వున్న ముఖ్యులు, బాధ్యులు సంస్కారాన్నే కోల్పోతారు. తెలుగు శాసనసభల్లో ఈ సంస్కారరాహిత్యమే కనబడుతోంది. 

ఇదే కొనసాగితే అంతిమంగా మానవీయ విలువలు కూడా మంచానపడతాయి.


ఇలా తెల్లారింది…


-ఎండ భలే సుఖం అనిపించిన శీతాకాలం వెనక్కిపోయి నీడ ఎంత సౌకర్యమో అనిపించే వేసవి ప్రభాత/ప్రభావ సమయం శరీరాన్ని గుచ్చుతున్నట్టువుంది.

-సీ్ట్రట్ ఫుడ్ అమ్మే బళ్ళు, కాకాహొటళ్ళు కిటకిటలాడుతున్నాయి

వీపుకి సంచులతో బైకులకు ఆనుకుని టిఫెన్లు తింటున్న మార్కెటింగ్ కుర్రవాళ్ళ గుంపులు

-క్లినిక్కుల తలుపులుతీస్తున్న ఆయాలు/సిబ్బంది

-దాదాపు అన్ని మందులషాపులూ తెరచే వున్నాయి

-ఫొటో స్టాట్ కాపీలు తీసే యూనిట్లు తెరచే వున్నాయి

-గుడుల్లో ప్రదక్షిణలు చేస్తున్న కొద్దిపాటి భక్తులు, బద్దకంగా పూజారులు కనబడ్డారు

-ఒక్క కిరాణా దుకాణం కూడా తెరచిలేదు

(ఇదిరాజమండ్రి-ప్రకాశంనగర్&దానవాయిపేట ల్లో16-3-2015 సోమవారం ఉదయం 8-30 సమయంలో నేను స్కూటర్ మీద ”మార్నింగ్ వాక్” చేసినప్పటి సన్నివేశాలు)

రుచికరమైన భోజనం అంటే….?


తీపి, పులుపు, ఉప్పు, కారం, చేదు, వగరు…రుచులున్న పదార్ధాలను ఎంచుకోవడం, లేదా ఎంచుకున్న పదార్ధాలకు ఆరు రుచులనూ ఆపాదించడమే వంట చేయడమంటే!
ఏ రుచి ఎన్ని పాళ్ళుండాలో నిర్ధారించడమే వంటలో ప్రావీణ్యం…షడ్రుచులూ సమ్మిళితమైన రుచుల సంవేదనని(సెన్స్) నాలుక మొన మెదడికి అందిస్తుంది. 
ఈ టేస్ట్, ఫ్లేవర్ రెండు గంటలుగా అలాగే వుందంటే దాన్ని రుచికరమైన భోజనంతిన్న సంతృప్తి అనుకోవచ్చు. 

ఉడకబెట్టి వేయించిన బంగాళాదుంపల్లో క్రిస్పీనెస్ కారాన్ని, ఉప్పటి కమ్మతనాన్నీ మెత్తగా నోట్లో బ్లాస్ట్ చేసిన అనుభవం. 

చిట్టి ఉల్లిపాయల పులుసులో ఉప్పూకారాలు సరే! చింతపండు గుజ్జులో ఉడికిన పచ్చిమిరపకాయల పుల్లటి ఘాటు, తీపి అని ప్రత్యేకంగా తెలియనంత తక్కువగా వేసిన బెల్లం కలిసి నాలుగు రుచులు స్పష్టంగానే తెలిశాయి

వేయించిన బూడిద గుమ్మడికాయ వడియాలూ…నూనెలో వేగి, పులుసులో నాని, మరిగిన ఆవాలు, జీలకర్ర, ధనియాలు వంటి ద్రవ్యాలు, నాలుకకు సూచనగానేతప్ప గాఢత లేని చేదు, వగరులను కూడా అందించి వుండాలి. అందుకే షడ్రుచుల సంవేదన హెచ్చు సమయం వుంది.

ఆయా రుచుల్లో గాఢత ఎక్కువైవుంటే అలాంటి టేస్టుని న్యూట్రలైజు చేసే ఏజెంటుగా కూడా  ఫైనల్ టచ్ తో పెరుగు రుచి అనుభూతిని ఫైన్ ట్యూన్ చేస్తుంది

నాకు వంట చేయడం రాదు. ఆసక్తివల్ల వంటగదిలోకి వెళ్ళినా, వెళ్ళూ అని నా భార్య పంపించేస్తుంది. మా కుటుంబానికి బాగా నచ్చేలా వండే తన ప్రావీణ్యం వయసు ముప్పై ఏళ్ళు.(ఇవే టేస్టులు అందరికీ నచ్చకపోవచ్చు).రుచి బాగోలేకపోయినా బాగున్నా చాలా చాలా బాగున్నా 30% కడుపు ఖాళీగా వుండే మేరకే పరిమితంగా /నిగ్రహంగా తినే ప్రావీణ్యాన్ని నేను సాధించడం మొదలు పెట్టి నాలుగునెలలే అయ్యింది. 








Create a free website or blog at WordPress.com.

Up ↑